Ֆերհեմ քաղաքից հարյուրամյա բրիտանուհի Դորիս Էյլինգը քաղաքային հիվանդանոցից նամակ է ստացել, ըստ որի՝ ինքը հղի է: Տարեց հիվանդին տեղեկացնում էին, որ նա պետք է ներկայանա հետազոտության և տա համապատասխան անալիզները՝ հաղորդում է The Sun-ը:
Ինչպես պարբերականին հաղորդել է Էյլինգը՝ փաստաթուղթն ընթերցելուց հետո նա միանգամից հասկացել է, որ ինչ-որ բան այնպես չէ, չնայած, որ անունն ու ծննդյան թիվը գինեկոլոգները ճիշտ էին նշել:
«Ես երեք երեխա ունեմ և 20 թոռ, բայց ես հղի չեմ եղել արդեն շուրջ 70 տարի: Ես 100 տարեկան եմ, ինչպե՞ս կարող էի հղիանալ», - նշել է կինը:
Հիվանդանոցի հետ կապ հաստատելով՝ Էյլինգը և նրա հարազատները պարզել են, որ սխալ է տեղի ունեցել: Տարեց կնոջից ու նրա ընտանիքից ներողություն են խնդրել անհագստության համար, որն առաջացրել էր այդ նամակը:
Ինչպես պատմել է կնոջ 76-ամյա որդին՝ մայրը լավ ծիծաղել է, երբ ամեն ինչ պարզ է դարձել: