Խնդրում ենք սպասել...

Հոդվածներ

Բժիշկ Հովհաննիսյանը շուրջ 40 տարի նվիրել է սահմանամերձ շրջանների բնակչության առողջության պահպանմանը

15:21, երեքշաբթի, 05 նոյեմբերի, 2019 թ.
Բժիշկ Հովհաննիսյանը շուրջ 40 տարի նվիրել է սահմանամերձ շրջանների բնակչության առողջության պահպանմանը

Ռուբիկ Հովհաննիսյան
    
     Կյանքի մեծ մասը նվիրել եւ նվիրում է բժշկությանը

    
    
    
    
    
    
    
    
    
    
     Լավագույն մասնագետները նրանք են, որոնք մասնագիտությունն ընտրում են առաքելության խոր գիտակցմամբ: Մարդու, առավել եւս բժշկի համար մասնագիտությունն առաջին հերթին առաքելություն է, կոչում: Այն շուրջ 40 տարի է՝ առաքելություն է նաեւ բժիշկ Ռուբիկ Հովհաննիսյանի համար:
    
     65-ամյա Հովհաննիսյանը 30 տարի է՝ Շիրակի մարզի Աշոցքի շրջանի «Տիրամայր Նարեկ» հիվանդանոցի թերապեւտիկ բաժանմունքի վարիչն է: «Հավասարակշռված, զգացմունքների մեջ՝ զուսպ, բայց անսահման բարի», - մեկ նախադասությամբ այսպես է նկարագրում Հովհաննիսյանին իր կրտսեր դուստրը՝ Նարինեն: Ռուբիկ Հովհաննիսյանն ունի չորս երեխա՝ երեք աղջիկ եւ մեկ տղա:


     Զարմանալի է, թե այդքան ծանր ու պատասխանատու աշխատանք կատարող մարդու մասին զավակներն ինչպիսի մեղմությամբ ու քնքշությամբ են խոսում: Եթե մի պահ մոռանաս նրա կատարած աշխատանքի ծանրությունը, կմտածես՝ խոսքն աննկարագրելի փխրուն անձնավորության մասին է: Եվ իսկապես, Ռուբիկ Հովհաննիսյանին ճանաչողները կփաստեն նրա հանգստության ու մարդասիրության մասին:


     Նա մարդ հակադրություն է. մի կողմում իր բարձր առաքելությամբ կատարած դժվարին աշխատանքն է, մյուս կողմում՝ նրա հանգստությունն ու մեղմությունը: Լռակյաց է, չի սիրում շատ խոսել: Երբ զավակները փորձում են մտաբերել հոր հաճախակի գործածած բառերը, ժպիտով միաբերան ասում են՝ «բալ ջան», -նն է:
     Ինչպես ասել է իսպանացի նշանավոր բժիշկ Խոսե դե Լյատումենդին, «Միայն բժշկություն իմացող բժիշկը նույնիսկ բժշկություն էլ չգիտե»: Բժիշկը պետք է գերազանց տիրապետի միջանձնային հարաբերությունների նրբություններին. Հովհաննիսյանն այդ ամենին տիրապետում է գերազանց:
    
     Ռուբիկ Հովհաննիսյանը ծնվել է Ջավախքում՝ Վրաստանի Նինոծմինդայի շրջանի Փոկա գյուղում: Տեղի միջնակարգ դպրոցը գերազանցությամբ ավարտելուց հետո՝ 1971 թվականին ընդունվել է Երեւանի բժշկական ինստիտուտ։ Ինստիտուտն ավարտելուց հետո աշխատանքի է նշանակվել Աշոցքի շրջանային հիվանդանոցում՝ որպես թերապեւտ, այնուհետեւ՝ նույն հիվանդանոցի բուժական մասի փոխտնօրեն։


     1988 թվականին տեղափոխվել է Ամասիայի շրջանային հիվանդանոց: Կարճ ժամանակ անց կրկին նշանակվել Աշոցքի «Տիրամայր Նարեկ» հիվանդանոցի թերապեւտիկ բաժանմունքի վարիչ եւ մինչ օրս բժշկի բարձր պարտքն է կատարում նույն համայնքում՝ ապահովելով ՀՀ հյուսիսային սահմանամերձ շրջանների բնակչության առողջության պահպանումը, տարիների հետ կրկնապատկելով ժողովրդի սերն ու հարգանքն իր նկատմամբ:

Առաջխաղացնել այս նյութը
Նյութը հրապարակվել է Մամուլի խոսնակի շրջանակներում:
Գրանցվի՛ր և հրապարակի՛ր քո հոդվածները:
Հավանել
1
Չհավանել
0
6017 | 0 | 0
Facebook