Եվ ահա Ամստերդամի Սուրբ Հոգի եկեղեցու սրահում, օրերս տեղի ունեցավ մանկավարժ-գործընկերների սպասված հանդիպումը, որին մասնակցելու էին եկել Ալմելոից, Հաագայից, Էյնդհովենից, Նայմեխենից, Դեն Բոսից, Դորդրեխտից: Ավելի, քան վեց ժամ տևած հանդիպման ընթացքում քննարկվեցին գործնական, աշխատանքային փորձի փոխանակման, ուսուցողական ծրագրերին և այլ թեմաներին վերաբերող հարցեր: Մտքերի փոխանակումն անցավ ջերմ ու ընկերական, անկաշկանդ մթնոլորտում: Երկրի տարբեր վայրերից ժամանած հայ ուսուցիչների միմյանց աշխատանքային փորձին ծանոթանալն ու ներանձնային շփումները, նաև փորձառու ուսուցիչների հետ մտքերի փոխանակումը` նոր ու բովանդակալից քննարկումների հիմք հանդիսացան: Ցավոտ հարց է, որ սփյուռքի դպրոցները չունեն միասնական ուսուցման համապարփակ ծրագիր ու լավ է, որ մեր ուսուցիչները ինքնուրույն կարողանում են ելք որոնել:
Հանդիպման արդյունքում որոշվեց ստեղծել երկու աշխատանքային խումբ՝ Նիդերլանդներում արդեն մի քանի տարի գործող մեկօրյա հայկական դպրոցների համագործակցության զգալի լայնացված հարթակի ներքո: Աշխատախմբերը կմշակեն Հայոց լեզվի դասավանդման երկփուլային միասնական ծրագիր, այն աստիճանաբար կփորձարկվի դպոցներում: Մանկավարժները գիտակցում են որ այս գործընթացը ժամանակատար է ու շատ ջանք կպահանջվի, ուստի տրամադրված են համբերությամբ ու հաստատակամությամբ` հույսով, որ այն հաջողությամբ է պսակվելու: Որոշվեց նաև նման հանդիպումներ կազմակերպել պարբերաբար, առնվազն տարին մեկ անգամ:
Նիդերլանդների հայ ուսուցիչները քննարկում են կրթական ծրագրեր