Ազատ է արձակվել Հայաստանի պետական սահմանը ապօրինի հատած Թուրքիայի քաղաքացի Ումութ Ալի Օզմենը: Նա ելքի օրինական թույլտվություն կստանա եւ կմեկնի հայրենիք Վրաստանով: Ումութը պատմել է թե՞ ինչպես է հատել սահմանը:
«Ծնողներիցս փոքր հասակից լեգենդներ եմ լսել թե ինչեր կան բլրի հետեւում եւ իմ մոտ հետաքրքրություն էր առաջացել դեռ այն ժամանակվանից տեսնել, թե ինչ կա: Այս տարի, երբ երկար ընդմիջումից հետո հոտը տարել էի յայլա, մայրիկին ասեցի գնում եմ նաեւ թեյի համար խոտաբույս հավաքեմ: Գնացի, եւ հետաքրքրությունից դրդված անցա բլրի մյուս կողմը»:
Դրանից հետո նրան բռնել են ռուս սահմանապահները, հետո հանձնել են հայ իրավապահներին: 60 օրերի ընթացքում հասցրել է ճանաչել նաեւ բանտախցի հայ ընկերներին եւ հիմնարկի աշխատակիցներին: Մուստաֆան նշեց, որ անձամբ է դիմել Հայաստանի իշխանություններին որդուն ազատ արձակելու համար: Նա շատ լավ է սովորում դպրոցում, եւ որոշել է վերադառնալ Հայաստան, եւ ընդունվել Բարձրագույն ուսումնական հաստատություն` ասում է Մուստաֆան:
Նրանք գոհ են հայերի լավ վերաբերմունքից:
Իսկ այսօր երեկոյան Ումութի ելքի օրինական թույլտվության տրամադրումից հետո, նրանք կմեկնեն Վրաստան եւ այնտեղից հայրենիք։ Հայաաստանի եւ Թուրքիայի միջեւ դիվանագիտական հարաբերություններ չկան ու տեղափոխումը կապահովվի երրորդ երկրի կողմից: Կարսում բոլորը սպասում են, պետք է գնանք՝ ասում է Մուստաֆան:
Հայաստանի պետական սահմանի ապօրինի հատման փաստով Թուրքիայի քաղաքացու նկատմամբ հարուցված քրեական գործը պատկան մարմինների կողմից կարճվել է՝ ելնելով մարդասիրական նկատառումներից:
