Խնդրում ենք սպասել...

Հոդվածներ

Կոմիտասի անվան լարային քառյակի գեղեցիկ ելույթը Նոր Նորքում

12:37, ուրբաթ, 22 հունիսի, 2018 թ.
Կոմիտասի անվան լարային քառյակի գեղեցիկ ելույթը Նոր Նորքում
     Երևանի քաղաքապետարանի մշակույթի վարչության նախաձեռնությամբ մայրաքաղաքի մշակութային կրթօջախներում մեկնարկել է «Ճանաչի՛ր ինձ» ծրագիրը: Առաջին հանդիպումը Կոմիտասի անվան ազգային քառյակի հետ էր՝ թավջութակահար, քառյակի համահիմնադիր Սարգիս Ասլամազյանի անունը կրող թիվ 1 երաժշտական դպրոցում: Դպրոցի սաներն ու նրանց ծնողները հնարավորություն են ունեցել ունկնդրելու կոմիտասյան երաժշտությունը շուրջ 95-ամյա պատմություն ունեցող լարային քառյակի կատարմամբ: Միջոցառմանը ներկա Երևանի քաղաքապետարանի աշխատակազմի մշակույթի վարչության պետ Ռուբեն Հովհաննիսյանը նշել է, որ նման հանդիպումները լինելու են շարունակական: «Դեռևս 2017 թվականից մենք աշխատում էինք ծրագրի ուղղությամբ: Ուրախ եմ, որ մեր և Կոմիտասի անվան քառյակի նախաձեռնությունը համընկավ և այսպիսով տրվեց «Ճանաչի՛ր ինձ» մշակութային ծրագրի մեկնարկը: Երևանի քաղաքապետարանի ենթակայության արվեստի և երաժշտական դպրոցներում, մշակույթի կենտրոններում տարվա ընթացքում սպասվում են մշակութային տարբեր գործիչների հետ հետաքրքիր հանդիպումներ, բաց դասեր», - նշել է Ռուբեն Հովհաննիսյանը: Կոմիտասի անվան ազգային քառյակի գեղարվեստական ղեկավար Էդուարդ Թադևոսյանն իր հերթին ընդգծել է նախաձեռնության կարևորությունն ու նկատել, որ շատ երեխաների համար նման հանդիպումները բացառիկ հետաքրքրական կլինեն: Համերգային ծրագրի ավարտին քառյակի անդամները շփվել են երեխաների հետ, նաև սիրով պատասխանել հարցերին՝ ներկայացնելով մանրամասներ քառյակի ստեղծման պատմության, հաջողության ճանապարհի և հետագա անելիքների մասին:
Առաջխաղացնել այս նյութը
Նյութը հրապարակվել է Մամուլի խոսնակի շրջանակներում:
Գրանցվի՛ր և հրապարակի՛ր քո հոդվածները:
Հավանել
0
Չհավանել
0
5424 | 0 | 0
Facebook