Պաշտոնական այցով Հայաստանի Հանրապետությունում գտնվող Կարելիայի Հանրապետության Օրենսդրական Ժողովի նախագահ Էլիսսան Շանդալովիչի գլխավորած պատվիրակությունն այցելել է Կոտայքի մարզ:
Պատվիրակությունը հանդիպում է ունեցել ՀՀ Կոտայքի մարզպետ Կ. Գուլոյանի հետ: Մարզպետը ներկայացրել է Կոտայքի մարզի տնտեսական առանձնահատկությունները, ինչպես նաև անդրադարձ կատարել պետական աջակցությամբ մարզում ընթացող զարգացման ծրագրերի ռազմավարական ուղղություններին:
Այնուհետև Օրենսդրական Ժողովի նախագահ Էլիսսան Շանդալովիչը ներկայացրել է Կարելիայի Հանրապետությունը բնութագրող որոշակի տեղեկություններ, ինչպես նաև խոսել հայ-կարելիական հարաբերությունների մասին:
Հանդիպման շրջանակներում քննարկվել են նաև Կարելիայի Հանրապետության վարչատարածքային միավորների և Կոտայքի մարզի ու վերջինիս համայնքների միջև համագործակցություն ձևավորելու հնարավորությունները:
Կարելիայի Հանրապետության Օրենսդրական Ժողովի նախագահի գլխավորած պատվիրակությունը եղել է նաև Կոտայքի մարզի տեսարժան վայրերում:
