«Նամակ եմ ստացել Լիոնում բուժվող ՀՀ տարեց քաղաքացուց, որի թոշակն ընդհատվել է: Բանկից զանգել են, ասել՝ արի ներկայացի, չի կարողացել գալ, դրա համար էլ հիմա թոշակ չի ստանում: Ինչպե՞ս է կարգավորվելու այս հարցը», - դիմելով սոցապ նախարար Արտեմ Ասատրյանին՝ հարցրեց «Ծառուկյան» դաշինքի պատգամավոր Նաիրա Զոհրաբյանը: Հիշեցնենք՝ խորհրդարանում քննարկվում է «Պետական կենսաթոշակների մասին» օրենքի փոփոխությունները՝ վերաբերվող բուժման նպատակով օտարերկրյա պետությունում գտնվող զինվորական ծառայության ու հաշմանդամության պատճառական կապ ունեցող անձանց: «Ներկայում կենսաթոշակը վճարվում է կանխիկ ու անկանխիկ եղանակով: Մեկ տարվա ընթացքում, եթե քաղաքացին կենսաթոշակն անձամբ չի ստանում, ևս մեկ տարի ժամանակահատված է սահմանված օրենքով, այսինքն՝ նա հետադարձով ստանալու իրավունք ունի: Երրորդ, չորրորդ տարվա խնդիրն, որն առաջարկում ենք լուծել այս նախագծով՝ զինվորական ծառայության պատճառական կապով հաշմանդամություն ունեցող անձանց մասով, դրա կարգավորման արդյունքների վերլուծությունից հետո, միգուցե, կարելի է նաև անդրադառնալ Ձեր բարձրացրած հարցին», - ասաց Արտեմ Ասատրյանը: |