Դուք կապշեք իմանալով, թե որքան գումար են ստանում Չակորը, Իչան, Վիրը և այլ դերասաններ ընդամենը մեկ նկարահանման համար.
 Վարդան Սարգսյանն այս անգամ մեկնել էր Մումբայ: Ինչպես Վարդանն է ասում, մեկնելու նպատակը հնդկական սերիալներից հայտնի դերասաններին նկարահանելն էր: Նա հետաքրքիր մանրամասներ է պատմել ճանապարհորդությունից, դերասաններից, նրանց ստացած հոնորարներից և նրանց մասնակցությամբ հաղորդման մասին: «Քանի որ ես հասկացա, որ մեր երկրում բավականին շատ են սիրում նրանց, որոշեցի նկարահանել: Մոտ մեկ ամիս աշխատել ենք այդ ուղղությամբ, որովհետև այդ ամենը բավականին բարդ էր կազմակերպել: Շատ կարևոր էր մեզ համար հայտնվել նկարահանման հրապարակում։ Ներկա եղանք երկու հեռուստասերիալի նկարահանումներին: Հաղորդման շրջանակներում մարդիկ կտեսնեն, թե Բոլիվուդում ինչպես են նկարահանվում սերիալները», - պատմում է Վարդանը և ավելացնում, որ դերասանները բավականին պահանջկոտ էին: ցԴերասանները մեծ հոնորարներ էին ուզում նրանց նկարահանելու համար: Մի անգամ պաշտոնական նամակով գրել էի. արդյունքում կես ժամ հարցազրույցի համար պահանջել էին 48.000 դոլար: Պարզ է, չէ՞, որ նման տարբերակ մեզ ձեռք չէր տալիս, ուստի պետք էր այլ տարբերակ: Դերասաններին նկարահանելու համար պետք է ասեմ, մեզ շատ հեղինակավոր մարդ է օգնել, ում անունը իր իսկ խնդրանքով չեմ կարող տալ: Ես շատ ուրախ եմ, որ դա մեզ հաջողվեց: Չենք նկարահանել մի քանի դերասանի՝ Բարուն Սոբթիին, ով պարզապես քաղաքում չէր, բայց խոստացել է իմ հաջորդ այցի ժամանակ նկարահանվել, և Սանայա Իրանիին, ով ուներ առողջական խնդիրներ և այդ ժամանակ հիվանդանոցում էր գտնվում: Իսկ «Մերժվածը» հեռուստասերիալի հանրահայտ Իչան իր գոռոզ պահելաձևով և դերասանին ոչ վայել պահվածքով չնկարահանվեց: Հիմա նույնիսկ, եթե նա ինձ խնդրի և վճարի, ես նրա հետ հանդիպելու ոչ մի ցանկություն չունեմ»: Վարդանը նաև պատմում է, որ դերասանները բավականին հասարակ էին. «Ասեմ, որ նրանք մեգաաստղեր չեն և այդքան հայտնի չեն Հնդկաստանում։ Այդ երկրում յուրաքանչյուր ժամի մոտ հիսուն սերիալ է լինում եթերում։ Քանի որ Հայաստանում դրանցից մի քանիսն են հեռարձակվում, ուստի նրանք բավականին հայտնի են այստեղ: Բավականին լավն էին դերասանները, հաճելի էր շփումը, ոչ մի գոռոզություն չտեսա, նրանցից մի քանիսը հարցերը պահանջել էին նախապես, բայց հանդիպումն այնքան ջերմ մթնոլորտում էր, որ այդ հարցերը բացարձակ մոռացվեցին, և ուղղում էի այն հարցերը, որոնք ցանկանում էի: Դերասաններից մի քանիսի հետ հանդիպել եմ հենց մեր հյուրանոցում, մի քանիսի զբաղվածության պատճառով մենք այցելել ենք նրանց նկարահանման տաղավար: Ասեմ, որ կապը նրանց հետ մինչ օրս էլ կա. եթե իմ Վայբեռը բացեմ, կտեսնեք, որ ամեն օր նրանց հետ խոսում եմ, մեր հարաբերությունները շատ ընկերական են»: «Չակորի համար ես պարզապես խելագարվում եմ: Անկեղծ` ֆանտաստիկ տաղանդավոր երեխա է: Մենք նրա ծնողների հետ էինք պայմանավորվել նրան նկարելու համար և գնացինք նրանց տուն: Նրանք ապրում էին Մումբայից երկու ժամ հեռավորության վրա գտնվող քաղաքում: Հաղորդման ժամանակ կտեսնեք, թե որտեղ է ապրում փոքրիկը: Խելագարի պես սիրում եմ այդ երեխային, որովհետև նախ՝ կիրթ, դաստիարակված, անգլերեն խոսում էր իդեալական, չնայած որ ինը տարեկան էր, բայց մեծի պես էր մտածում: Նրանք պատրաստվել էին մեր այցին, երբ գնացինք նրանց տուն, հենց փոքրիկ Չակորն էր մեզ հյուրասիրում: Նրանք հիմա մեծ գումար են ծախսում երեխայի կրթության վրա, նա սովորում է բարձրակարգ և թանկ մի դպրոցում: Նկարահանումից հետո մենք երկար խոսեցինք նրա հետ: Խոստացել եմ նրան, որ կտեսնի Հայաստանը շատ շուտով: Տապասիայի մասին էլ կարող եմ ասել, որ հրաշալի դերասանուհի, հրաշալի անձնավորություն էր, որի հետ հաճելի էր շփվել, և այն, ինչ մարդիկ տեսնում են հեռուստասերիալում, պատկերացրեք, հակառակն է: Օրինակ՝ մյուս դերասանուհիները, ովքեր համեստ և դրական կերպարներում էին հանդես գալիս, բացարձակ հակառակը դուրս եկան»: Վարդանը խոստովանում է, որ հիմա զբաղված է դերասանների՝ Հայաստան այցի կազմակերպման հարցերով, ինչը մեծ ֆինանսներ է պահանջում: «Ես գիտեմ, թե որքան մարդ է սպասում նրանց: Առաջիկա այցիս ժամանակ արդեն կհասկանանք՝ որքանով է հնարավոր դա կազմակերպել, բայց ես ուրախ եմ, որ կարողացանք մեր պլանավորած դերասանների գոնե ութսուն տոկոսին նկարահանել»: «Տնից հեռու» հաղորդաշարը եթերում կլինի մայիսի կեսերին, մոտ յոթ-ութ հաղորդում կցուցադրվի դերասանների մասնակցությամբ: Վարդանը կրկին մեկնում է Մումբայ՝ երկու դերասաններին նկարահանելու համար, որոնց նախորդ այցի ժամանակ չէր հաջողվել նկարահանել: «Ես բերել եմ նաև դերասանների լուսանկարներն իրենց ստորագրություններով, մաղթանքներով, որոնք կխաղարկվեն եթերից անմիջապես հետո Ինստագրամի իմ էջում: Տարին մի քանի անգամ մենք ճանապարհորդություն ենք կազմակերպելու դեպի Հնդկաստան։ Ես ևս մեկնում եմ խմբի հետ «Տնից հեռու» -ի տուրիստականի շրջանակներում, որի ընթացքում մարդիկ հնարավորություն կունենան հանդիպելու հայտնի դերասանների հետ»: |
