ԳՅՈՒՄՐՈՒ ՎԵՐԱԿԱՆԳՆՄԱՆ ԾՐԱԳՐԵՐԻ ԻՐԱԿԱՆԱՑՄԱՆ ԳՈՐԾՈՒՄ ԵՍ ՍԱՄՎԵԼ ԲԱԼԱՍԱՆՅԱՆԻ ՀԱՄԱԿԻՐՆ ԵՄ
 Գյումրու թիվ մեկ հիմնախնդիրը քահրիզներն են Տեկտոնական խզվածքի և արտեզյան ջրերի բարձր մակարդակի պայմաններում Ալեքպոլը եղել է սալահատակ, երկհարկանի քաղաք` բնիկ քաղաքաշինական գերազանց լուծումների և եվրոպական չափանիշների միաձուլման հազվադեպ օրինակ: «Կումայրի» արգելոց թանգարանի տարածքում ամենօրյա գրանցվող վերգետնյա փլուզումները և այդ փլուզումները շինարարական ու կենցաղային աղբով ժամանակավոր ծածկելու անթույլատրելի սովորույթը օր օրի քահրիզների խցանումները դարձնում է անդառնալի: Ժամանակին քաղաքի մտավորականների կողմից բարձրագույն իշխանություններին ներկայացվել է քահրիզների վերականգնման և կանաչ տարածքները պահպանելու լուրջ և ծավալուն ծրագիր, որը ցավոք առ այսօր մնացել է թղթի վրա: Նույնիսկ եթե տարվա մեջ երեք անգամ ամենաբարձր որակով ասվալտապատման աշխատանքներ կատարվեն, միևնույնն է Գյումրիում փողոցաշինությունը ամենամեծ ծախսերով հանդերձ չի կայանալու: Միջուկի տարածքը կազմում է մոտ 1000 հեկտար: Ստորգետնյա անցումների տիրույթը ևս տեղավորված է այդ տարածքում: Գետնուղիները ժամանակին Ալեքպոլն ու Ղարսը կապել են իրար, ունեցել են նաև բերդաքաղաքի նշանակություն: Մասնագետների ձեռքի տակ կա քահրիզների քարտեզը` վերականգնման մանրամասն ծրագրով: Քահրիզների, գետնուղիների և ստորգետնյա ջրատարերի վերանորոգումը իհարկե պահանջում է լրջագույն ներդրումներ և քաղաքաշինական գրագետ մոտեցումներ, իր բացառիկությամբ հավերժական քաղաքի երաշխիք դառնալով: Մի քանի տարի առաջ արտասահմանյան ներդրողների կողմից քահրիզների վերականգնման ծրագիր իրագործվեց Հայաստանում, սակայն մեր ապաշնորհ ղեկավարության անգործության պատճառով այն իրականացվեց եթե չեմ սխալվում Գորիսում: ՀԱՅՏ ԱՌԱՋԱՐԿ ԳՅՈՒՄՐԻ ՀԱՄԱՅՆՔԻ ՂԵԿԱՎԱՐ ՍԱՄՎԵԼ ԲԱԼԱՍԱՆՅԱՆԻՆ Հարգարժան պարոն Բալասանյան. Խնդրում եմ Ձեր ուշադրությունը սևեռեք այս խնդրի վրա, համոզված եմ, որ հաջորդ 4 տարիների ընթացքում Դուք անպայման տարբերակներ կգտնեք այս հիմնախնդիրը լուծելու և Գյումրին իրոք բացառիկ քաղաք դարձնելու ճանապարհը: Հ.Գ. Եթե Սև բերդի խնդրում անհանդուրժելի է հուշարձանի խեղումն ու ամրոցի յուրաքանչյուր քառակուսի մետրի համար առկա է կառույցի սեփականատեր Սամվել Բալասանյանից շուրջ 200.000 ԱՄՆ դոլար տուգանքի հեռանկարը, ապա անուրանալի է նաև նրա` որպես Գյումրու քաղաքապետ տեղեկացված լինելու, ճշգրիտ և մասնագիտորեն հիմնավորված լուծումներ գտնելու, ոչ թե ֆորմալ, այլ իրատեսական բիզնես ծրագրեր իրագործելու, վարկային ռեսուրսներ ներգրավելու հարցերում: Սամվել Բալասանյանի ուղենշած քաղաքի զարգացման համալիր իրականացումը կբերի ինքնաբավ քաղաք-պետության ստեղծմանը, որպիսին Ալեքպոլը եղել է դարասկզբին, առանց գերատեսչական կախվածության… Գյումրու քաղաքապետի բոլոր այն հնարավոր թեկնածուներին, որոնց թվաց թե իմ հեղինակած «Ռազմական նշանակություն ունեցող ԲԵՐԴԸ մոթելի են վերածել» հոդվածը կանաչ ճանապարհ է բացելու իրենց համար, կամ ես շարունակելու եմ իրենց ջրաղացին ջուր լցնել, չարաչար սխալվում են: Սև բերդի դեպքում ես Սամվել Բալասանյանի հակառակորդն եմ, Գյումրու վերականգնման ծրագրերի իրականացման գործում` համակիրը: Հասմիկ Մելքոնյան Գյումրի |
