Դատարկամի՛տ Դատարկություն, ԴՈՒ ԻՆՁ ՉԵ՛Ս ՄԱՐՍԻ...
00:15, երեքշաբթի, 29 հունվարի, 2013 թ.
-Դատարկությու՛ն, որ խցկվել ես ներսս, որտե՞ղ ես ապրում:Հարց, որի պատասխանն ունենալով հանդերձ, հաճախ կրկնում եմ ու ապուշի նման ամեն անգամ քեզ ուզում եմ կենտրոնացնել մի վայրում մնացածներին փրկելու համար, չնայած` զգում եմ, որ, արյանս գնդիկներին փաթաթված, շրջանառվում ես ամբողջ մարմնովս: -Լռի՛ր: -Իսկ կուզե՞ս գրկեմ քեզ: - Գրկե՞ս, այնպես, ինչպես ես քե՞զ: - Քեզ թվում է` դու ինձ գրկել ե՞ս (հեգնա՛նք, իմ փոխարեն բարձրաձայն ծիծաղիր, խնդրում եմ): Մի՞թե գրկելն այլ իմաստ ունի, որ ես չգիտեմ: Դու ինձ չես գրկել, այլ կուլ ես տվել ու ամեն օր շատ լուրջ աշխատում ես ինձ մարսելու ուղղությամբ: - Վախենու՞մ ես ինձանից: - Ես կասեի ուղղակի ձանձրացնում, երբեմն էլ ցավեցնում ես: - Կգ՞ա օր, որ կիշխեմ քեզ: - Թույլ չե՛մ տա: - Իսկ, եթե նորից կուլ տամ քե՞զ: - Գուցե, բայց չես մարսի: - Ես կփաթաթվեմ ոտքերիդ, որ կկանխեմ առաջխաղացումդ: - Այդ դեպքում, ես այնքա՜ն վստահ կքայլեմ, որ ոտքերիս դոփյունից խլանան, անիմաստ ցանկությանդ ոգևորող ճիչերը, ավելի լայն կվերցնեմ քայլերս, որ ընդարձակվելուց պատռվես: - Իսկ, եթե բռնե՞մ ձեռքերդ: - Ամբողջ ուժով կծափահարեմ, այնպես, որ ափերիս ներսում հարվածներից առաջացած նուրբ թրթռումը ցնցի քեզ, հիմնատակ քանդի : - Ուրեմն կկախվեմ պարանոցիցդ: - Ջանք չես խնայում ինձ ծնկի բերելու համար, բայց այդ դեպքում էլ ունեմ փրկություն: Երբ կախվես պարանոցիցս ու սկսես օրորվել, երջանկության անունը փակվող դռան նման կշրխկացնեմ երեսիդ ու ստիպված կլինես դուռը կրծել, իսկ ճակատիցդ թափվող քրտինքի յուրաքանչյուր կաթիլ, քեզ խոնավեցնելով, կծանրացնի: Թույլ ձեռքեր ու շաաաաատ ծանր մարմին. չեմ նախանձի քեզ:- Չ՞է որ դու սիրում ես ամեն ինչ գունավորել: Ես կկուրացնեմ քեզ:
- Ես գույները ոչ միայն տեսնում եմ, այլև զգում եմ: Փակ աչքերով ավելին եմ տեսնում: Մի բան էլ` մթության մեջ քեզանից ազատվելն ավելի հեշտ է, որովհետև հիմար չեմ, որ սկսեմ դատարկություն փնտրել : Կվազեմ դեպի լույսը ` չնկատելով քեզ: - Ես ունե՞մ դրական կողմեր: - Իհարկե: Դու մոտիվ ես ամեն ինչի հասնելու: Չհասկանալով գուցե զբաղեցնում ես կարևոր արժեքների տեղերը ու անընդհատ հիշեցնում ես, որ քեզ լցնել է պետք դրանցով: - Այսինքն ցանկացած բացասական բանից կարելի է ստանալ դրականը: - Չեմ մտածել ` կարելի է արդյոք իրար հակադիր երկու բնութագրիչների նույնացնելու վրա աշխատել, համենայնդեպս վստահ եմ, որ ճիշտ մոտեցման, խելացի վերլուծման դեպքում գոնե ոսկե միջինը առանձնացնել կստացվի: - Ուզում եմ գրկես ինձ, որովհետև զգում եմ, որ գրկելով ինձ կուլ չես տա... - Նախքան մտերմիկ գրկախառնությունը թույլ տուր հիշեցնել քեզ, դատարկամի՛տ Դատարկություն` ԴՈՒ ԻՆՁ ՉԵՍ ՄԱՐՍԻ: |
Հավանել
1
Չհավանել
0
8236 | 0 | 1 | 0