Կայուն ու ամուր տուն կառուցելու համար պետք է ամուր ու աներեր լինի տան հիմքը:
Մայիսի 20-ին, Արագածոտն մարզի Բազմաղբյուրի Նվեր Սաֆարյանի անվան միջնակարգ դպրոցի 4-րդ դասարանցիները, դասվար ՝ Ա. Գրիգորյանի ղեկավարությամբ կազմակերպել էին հրաժեշտի ցերեկույթ՝ «Իմ երազների անավարտ հեքիաթ...» վերնագրով: Ասմունքում էին երեխաները՝ ղեկավարվելով իրենց սիրելի ուսուցչուհու աչքերի լուռ հրահանգով, թախծոտ հայացքի ջերմությունից ոգևորված: Նրանց խոսքն ուղեկցվում էր մեղմ երաժշտության հնչյուններով: Հուզմունքն ու հիացմունքը միախառնվել էին...
Երեխաներին ողջունեցին, գովեստի և շնորհավորանքի խոսքեր ասացին, դպրոցի տնօրեն՝ Մարինե Ղազարյանը, ուսմասվար՝ Վարսենիկ Հարությունյանը և մեթոդ միավորման նախագահ՝ Գայանե Մուրադյանը: Ոգևորիչ և պարտավորեցնող էին նրանց խոսքերը, ջերմ ու սրտաբուխ մաղթանքները...
Մեծ է ուսուցչի, մանկավարժի դերը ապագայի մարդու՝ աշխարհը կառուցողի, կամ էլ գուցե վերակառուցողի դաստիարակման գործում: Որքան սեր, բարություն, հոգատարություն և ծով համբերություն է պետք այս հետաքրքիր, պատասխանատու և միևնույն ժամանակ դժվար գործն իրականացնելու համար:
Միջոցառումն ավարտվեց դասվարի մաղթանքներով՝
...ՈՒ մանկության երազների հեքիաթում,
Դառնաք հերոս՝ գլխավոր,
Չարը կորչի անհատակ,
Բարին լինի ընդմիշտ ձեզ հետ,
Եվ ուղեկցի դեպի՝ կյանք...