«Խաբեբաների և գողերի կուսակցություն» («Партия жуликов и воров» -ПЖиВ) . սա Ռուսաստանը կառավարող «Եդինայա Ռոսիա» («Միասնական Ռուսաստան») կուսակցության մականունն է, որը գործածում են այդ կուսակցության ընդդիմախոսներն ու իշխանությունների գործողություններից դժգոհները։
«Մարդիկ լիովին կորցրել են հավատը կառավարության, խարդախներից և գողերից կազմված իշխող կուսակցությունների նկատմամբ, մարդիկ նաև հոգնել են անազնիվ ընտրություններից», - դեռևս 2015 թվականին գրել է ընդդիմադիր քաղաքական գործիչ Դմիտրի Գանինն իր «Անիծյալ աշխարհ» գրքում: Ենթադրվում է, որ արտահայտությունն առաջին անգամ օգտագործել է ընդդիմադիր քաղաքական գործիչ Ալեքսեյ Նավալնին 2011 թվականի փետրվարի 2-ին «Финам-Fm» ռադիոկայանին տված հարցազրույցի ժամանակ: «Ես շատ վատ եմ վերաբերվում «Եդինայա Ռոսիա» կուսակցությանը: Սա կոռուպցիայի կուսակցություն է, ստահակների ու գողերի կուսակցություն», - ասել է նա։ Հարցազրույցից հետո Նավալնին իր բլոգում հրապարակել է հարցում. « «Եդինայա Ռոսիա» կուսակցությունն արդյո՞ք գողերի և խարդախների կուսակցություն է»: Բլոգի ընթերցողների մեծամասնությունը դրական է արձագանքել այս հարցին, որից հետո արտահայտությունը սկսել է հանրաճանաչություն ձեռք բերել համացանցում և դարձել է մեմ։ Շատ հնարավոր է, որ արտահայտությունը ոգեշնչված է Վիկտոր Պելևինի «Չապաևը և դատարկությունը» (1996) աշխատությունից, որը պարունակում է հետևյալ միտքը. «Եթե նույնիսկ հնարավոր համարենք, որ այս սարսափելի երկրում իշխանությունը ոչ թե կընկնի այդ իշխանության համար կռիվ տվող խմբավորումներից մեկի, այլ՝ ստահակների ու գողերի ձեռքը, ապա նույնիսկ այդ ժամանակ ռուս մտավորականը շան վարսավիրի պես կվազի նրանց մոտ պատվեր ստանալու համար» ։ 2013-ին «Էխո Մոսկվի» ռադիոկայանի եթերում Վլադիմիր Ժիրինովսկին ասել է, թե հենց ինքն է դեռևս 2009 թվականին «Խաբեբաների և գողերի կուսակցություն» արտահայտությունը հորինել, իսկ Նավալնին կրկնել է այն:
