Մի աղքատ մարդու կին մեկ կիլոգրամանոց կլոր պանիրներ է պատրաստել, իսկ ամուսինը դրանք վաճառել է նպարավաճառին:
Բայց մի անգամ նպարավաճառը կասկածել է այս մատակարարին, կշռել է նրա հանձնած պանիրը և տեսել է, որ այն 900 գրամ է կշռում: Նպարավաճառը, բնականաբար, զայրացել է, և հաջորդ օրը, երբ աղքատը պանրի հերթական խմբաքանակն է բերել, որ հանձնի, նպարավաճառը նրան ասել է.
-Ես քեզանից այլևս պանիր չեմ գնի, քանի որ դու ինձ խաբում ես. դու ընդամենը 900 գրամ քաշ ունեցող մեկ կլոր պանիրը մեկ կիլոգրամանոցի տեղ ես անցկացնում:
Շփոթահար աղքատը խեղճացած պատասխանում է.
-Մենք կշեռք չունենք, այդ իսկ պատճառով ես քեզանից մեկ կիլոգրամ շաքար գնեցի և այն կշռաչափ դարձրի, որպեսզի դրանով կշռենք քեզ հանձնվող պանիրը: