Խնդրում ենք սպասել...

Հոդվածներ

«Մի՞թե այդ սեխերը քեզ կամ քո հորն էին պատկանում»

01:00, կիրակի, 26 հունիսի, 2022 թ.
«Մի՞թե այդ սեխերը քեզ կամ քո հորն էին պատկանում»

Միջնադարյան արաբ ամիրաներից մեկի արքունիքում ծառայող մի բարձրաստիճան պաշտոնյա՝ Զու Նուն իբն Մուսա անունով, իր ծառայակիցներից մեկին իր մանկության տարիների հետևյալ դիպվածն է պատմել.

«Երբ ես դեռ երեխա էի, - ասել է նա, - մի օր, հորս հանձնարարությամբ, էշին սեխեր բարձած, մեկնեցի Ասկար (քաղաք Իրաքում), որպեսզի դրանք վաճառեմ:

Ճանապարհին հանդիպեցի բազմաթիվ զինվորների, որոնցից մի քանիսը մոտեցան ինձ. նրանցից մեկն առանց հարցնելու վերցրեց երեք կամ չորս սեխ, և նրանք շարունակեցին իրենց ճանապարհը: Ես վախեցա, որ կորուսյալ սեխերի համար պատժվելու եմ և սկսեցի լաց լինել ու ողբալ, իսկ էշս էլ զռռոցը կապեց:

Հանկարծ մեզ մոտեցավ մեկ այլ՝ առավել մեծ զինվորական ջոկատ: Առջևից ընթացողը կանգ առավ ու ինձ հարցրեց. «Տղա՛, ինչո՞ւ ես լալիս ու ողբում»: Երբ ես նրան բացատրեցի, թե ինչ է տեղի ունեցել, նա դարձավ զինվորներին ու ասաց. «Անմիջապես այստե՛ղ բերեք այդ մարդուն»: Հնարավոր է, որ սեխերս խլողն իմ հետևում էր կանգնած, որովհետև նրան անմիջապես գտան ու բերեցին: Հեծյալը հրամայեց նրան մտրակել, իսկ ինքն ամբողջ ընթացքում չհեռացավ: Ես էշիցս չիջա, և ամբողջ զորքը կանգ առավ: Հեծյալը մի գլուխ հայհոյում էր սեխերս խլողին՝ նրան «շուն» անվանելով, իսկ հետո նրան հարցրեց. «Մի՞թե դու փող չունեիր, որ այդ սեխերի համար վճարեիր: Մի՞թե դու չէիր կարող դրանք գնել: Մի՞թե այդ սեխերը քեզ կամ քո հորն էին պատկանում: Չէ՞ որ մարդը տանջվել է, սերմանել է, ջրել է, սերմերի համար վճարել է ու նաև հարկեր է վճարել»:

Նա շարունակեց այդպիսի հարցեր տալ մեղավորին մտրակահարելու ամբողջ ընթացքում: Իսկ հարվածների թիվը երևի հարյուր կլիներ: Դրանից հետո հեծյալը կարգադրեց բարձրացնել այդ զինվորին, և նրանք ճանապարհ ընկան:

Զինվորներից մեկը սկսեց հայհոյել ու անիծել ինձ, որ մի քանի սեխի համար իրենց ընկերը մտրակի շուրջ 100 հարված է ստացել: Իսկ ես զինվորներից մեկից հարցրեցի, թե ով է այդ հեծյալը, և նա պատասխանեց, թե ալ Մութադիդ Ալալահն* է»:

*Աբբասյան հարստության՝ 870 – 892 թթ. գահակալած ամիրայապետ (խալիֆ):

Առաջխաղացնել այս նյութը
Նյութը հրապարակվել է Մամուլի խոսնակի շրջանակներում:
Գրանցվի՛ր և հրապարակի՛ր քո հոդվածները:
Հավանել
0
Չհավանել
0
1039 | 0 | 0
Facebook