Մայրաքաղաքի Նալբանդյան 2/1 հասցեում՝ «Հանրապետության հրապարակ» մետրոկայարանի հարակից այգու սկզբնամասում, Երևանի քաղաքապ Տարոն Մարգարյանի հանձնարարությամբ այսօր բացվել է Երևանի զբոսաշրջային տեղեկատվական աջակցության և քաղաքացիների սպասարկման առաջին կետը:
Բացման հանդիսավոր արարողությանը ներկա են գտնվել Երևանի քաղաքապետի օգնական Մարիա Բարաղամյանը, քաղաքապետարանի աշխատակազմի մշակույթի վարչության պետ Ռուբեն Հովհաննիսյանը, տուրիզմի բաժնի պետ Գևորգ Օրբելյանը, զբոսաշրջային ոլորտի ներկայացուցիչներ, գործընկերներ: Միջոցառումն ուղեկցվել է երևանյան երաժշտությամբ, պարային համարներով և հյուրասիրությամբ: Կարմիր ժապավենը կտրել են քաղաքապետի օգնական Մարիա Բարաղամյանը և քաղաքապետարանի աշխատակազմի տուրիզմի բաժնի պետ Գևորգ Օրբելյանը:
Կարևորելով նմանատիպ աջակցության և սպասարկման կետերի դերը ինչպես ցանկացած քաղաքի, այնպես էլ Երևանի զբոսաշրջության զարգացման համար, քաղաքապետի օգնական Մարիա Բարաղամյանը նշել է. «Հաշվի առնելով, որ տարին հոբելյանական է Երևանի համար և ակնկալվում է զբոսաշրջիկների մեծ հոսք: Դեռևս այս տարի մարտին Երևանի քաղաքապետ Տարոն Մարգարյանը հանձնարարել էր քաղաքապետարանի համապատասխան վարչություններին սեղմ ժամկետում քննարկել և առաջարկություններ ներկայացնել մայրաքաղաքում զբոսաշրջային տեղեկատվական աջակցության կետերի տեղադրման վերաբերյալ: Եվ ահա այսօր բացվում է առաջին կետը Նալբանդյան 2/1 հասցեում:
Ծրագրի նպատակն է մեր համաքաղաքացիներին և քաղաքի հյուրերին աջակցել տեղեկատվության տրամադրման, քաղաքում կողմնորոշման, քաղաքի զբոսաշրջային ենթակառուցվածքների, քաղաքապետարանի կողմից մատուցվող ծառայությունների վերաբերյալ տեղեկատվության տրամադրումը: Առաջիկայում կբացվի նաև երկրորդը»:
