Այսօր, չնախատեսված այց ունեցանք Ֆանտանի միջնակարգ դպրոց:
Կրթական գործընթացն իրականացվում էր բնականոն: Դասասենյակներում պահպանվում էր ջերմային ռեժիմը, իսկ միջանցքներում` ոչ: Առողջության պատճառով բացակա աշակերտների թիվը մեծ չէր:
Դպրոցական շենքի արտաքին տեսքը թեև բավական գրավիչ է, սակայն կառույցի ֆիզիկական մաշվածությունն արդեն նկատելի է /կառուցվել է նախորդ դարի 60-ական թվականներին /:
Ինչպես նշեցին ուսուցիչները, այս պահին առաջնային խնդիր է դարձել ֆիզկուլտուրայի դահլիճը, որտեղ փտած հատակի պատճառով երբեմն վնասվում են աշակերտները: Բանն այն է, որ դահլիճի ներքևի հատվածը /մոտ 2 մետր/ նկուղային է, անձրևաջրերի հեռացումն այլևս հնարավոր չէ իրականացնել և խոնավությունը ներծծվում է պատերի մեջ, նույն պատճառով վնասվում է նաև հատակը:
Բարերարների աջակցությամբ վերանորոգվել է նիստերի դահլիճը, փոխվել են դպրոցի բոլոր պատուհանները, վերանորոգված է նաև մասնաշենքերից մեկը:
Տեխնիկապես համալրման կարիք ունի դպրոցի համակարգչային կաբինետը:
Հ. գ. - Դպրոցը ջեռուցվում է էլեկտրական վառարաններով, որը ջեռուցման ծախսն անհամեմատ է դարձնում: Յուրաքանչյուր ֆինասական տարի, վերահաշվարկի արդյունքում, մարզպետարանը լրացուցիչ գումար է տալիս` ջեռուցման ծախսերը փակելու համար:
Խնդիրը հնարավոր է լուծել միայն պետական աջակցության և դպրոցի հիմնանորոգման միջոցով: Հուսանք, որ այն կլինի մոտ ապագայում:
Ի դեպ, դպրոցն ունի հրաշալի մասնագետներ և գովելի արդյունքներ:
Հ. Ադամյան
