Մայրենիի 4-րդ դասարանի ինքնուրույն ընթերցանության դասի թեման էր «Ճանաչենք մեր մեծերին»: Դասվար Ն. Հովհաննիսյանը շատ լավ էր պատրաստվել դասին՝ ներկայացնելով յուրօրինակ կահավորանք. Հայաստանը խորհրդանշող նռնենին՝ իր ծանրացած պտուղներով, յուրաքանչյուր պտուղ՝ Հայաստան աշխարհի հանճարեղ ու ճանաչված զավակների պատկերներով, պատի թերթ յուրաքանչյուր ստեղծագործողի մասին, տեսաձայնասկավառակ: Խմբային մեթոդով ներկայացրին արվեստի տարբեր ճյուղեր՝ շրջայց կատարելով տարբեր արվեստագետների ցուցասրահներում: Աշակերտների կարդալու տեխնիկան, ասմունքելու ձիրքը, դերասանական խաղը և երգերի վարպետ կատարումները փաստում են դասվարի ստեղծագործ, հետևողական աշխատանքի մասին:
