Կոտայքի մարզպետ Կ. Գուլոյանը մասնակցել է Չարենցավան քաղաքում հիմնանորոգված «Ծիծեռնակ» նախակրթարանի վերաբացման հանդիսավոր արարողությանը:
Տոնական միջոցառմանը մասնակցել են Հայաստանի տարածքային զարգացման հիմնադրամի գործադիր տնօրեն Ա. Կիրակոսյանը, Չարենցավանի քաղաքապետ Հ. Շահգալդյանը, համայնքի ներկայացուցիչներ, ինչպես նաև հյուրեր:
Հայ Առաքելական եկեղեցու Կոտայքի թեմի Չարենցավանի Սուրբ Փրկիչ եկեղեցու հոգևոր հովիվ Տեր Իսահակ քահանա Մարգարյանի օրհնության խոսքով մեկնարկած միջոցառումը շարունակվել է պաշտոնական ելույթներով և նախակրթարանի սաների ուժերով կազմակերպված հանդիսությամբ:
Այնուհետև Կոտայքի մարզպետ Կ. Գուլոյանը Չարենցավանի քաղաքապետ Հ. Շահգալդյանի ուղեկցությամբ շրջել է «Ծիծեռնակ» նախակրթարանի տարածքում, ծանոթացել հիմնանորոգված հաստատության աշխատանքային պայմաններին:
Հավելենք, որ նախակրթարանի հիմնանորոգումը մեկնարկել է 2016 թվականի սեպտեմբերից. աշխատանքների իրականացման համար Հայաստանի տարածքային զարգացման հիմնադրամի կողմից ներդրվել է շուրջ 158 մլն դրամ, իսկ Չարենցավան համայնքի կողմից կատարվել են շուրջ 10 մլն դրամի չափով աշխատանքներ, որում ներառվել է նաև կահավորման գործընթացը:
Չարենցավանի «Ծիծեռնակ» նախակրթարան են այցելում շուրջ 330 երեխաներ:
