Երկաթուղային փոխադրումներ իրականացնող ռուսական «Տրանսկոնտեյներ» և «Ադրբեջանական երկաթուղիներ» ընկերությունները համագործակցության հուշագիր են ստորագրել:
Ընկերությունները մտադիր են, նորարարական տեխնոլոգիաների ու կոմբինացված տրանսպորտային միջոցների ներդրմամբ, «Հյուսիս-Հարավ» միջազգային տրանսպորտային միջանցքով բազմամոդալային (այսինքն՝ օդով ցամաքով և ջրով բեռնափոխադրուների զուգորդում) փոխադրումների համար բարենպաստ պայմաններ ապահովել: Բացի այդ, կողմերը մտադրվել են բարելավել բեռնափոխադրումների որակը՝ ինչպես արտահանման ու ներմուծման, այնպես էլ տրանզիտային հաղորդակցության ոլորտներում:
Համագործակցությունը նախատեսում է կողմերի մասնակցությամբ իրականացվող արտաքին առևտրային փոխադրումներին վերաբերող ամենաթարմ տեղեկատվության փոխանակում, «Հյուսիս-Հարավ» միջազգային տրանսպորտային միջանցքով լրացուցիչ բեռնահոսքեր ընդգրկելու նպատակով առաջարկությունների նախապատրաստում և իրականացում՝ կոնտեյներային գնացքների կիրառմամբ ու նաև երկաթուղային տրանսպորտով բեռների փոխադրման ոլորտի մարկետինգային համատեղ հետազոտությունների անցկացում:
Ռուսական կողմից հուշագիրն ստորագրել է վերոնշյալ ընկերության գլխավոր տնօրեն Պյոտր Բասկակովը:
