Կոտայքի մարզպետ Ռոմանոս Պետրոսյանը այցելեց խոշորացված Ակունք համայնք՝ ծանոթանալու համայնքապետարանի աշխատակազմի և Նոր Գյուղում հանրային լսումներ իրականացնելու համար: Այցը սկսվեց Ակունքի համայնքապետարանից, որից հետո պարոն Պետրոսյանը այցելեց Ակունք գյուղի գրադարան, մշակույթի կենտրոն, բուժամբուլատորիա, հոգևոր կենտրոն, եկեղեցի, դպրոց և դեռ կառուցման փուլում գտնվող մանկապարտեզ: Տեղում իրազեկվելով համայնքում առկա խնդիրներին և կարևորելով դրանց հրատապ լուծման անհրաժեշտությունը, պարոն Պետրոսյանը ճանապարհը շարունակեց դեպի Կոտայք գյուղ: Կոտայքում այցելություն եղավ գյուղի մշակույթի կենտրոն և դպրոց: Այցելության վերջին հանգրվանը եղավ Նոր Գյուղի դպրոցը, որտեղ և անցկացվեց հանրային լսումները: Լսումներին ներկա էին գյուղի ակտիվ բնակիչները, ովքեր իրենց հուզող հարցերը բարձրաձայնեցին Կոտայքի մարզպետին և Ակունք համայնքի ղեկավարին: Իրականում գյուղը ունի բազմաթիվ չլուծված խնդիրներ, որոնք կուտակվել են տարիներ շարունակ և որոշակի ժամանակ է հարկավոր դրանք վերացնելու համար: Պարոն Պետրոսյանը իր հուսադրող խոսքն ու պատրաստակամությունը հայտնեց կանգնելու հասարակ գյուղացու և համայնքի ղեկավարի կողքին, որպեսզի միահամուռ ուժերով լուծում տրվեն բոլոր խնդիրներին: Լսումների ժամանակ քննարկվեց նաև գյուղի վարչական ղեկավարի նշանակման հարցը: Առաջադրվեցին 4 թեկնածուներ, որոնցից էլ համայնքի ղեկավարը, օրենքով իրեն վերապահված լիազորությունների շրջանակներում, կնշանակի վարչական ղեկավար:
https://www.facebook.com/
