Երևանի քաղաքապետ Տարոն Մարգարյանի նախաձեռնությամբ մայրաքաղաքի վարչական շրջանների և ՀՀ մարզերի միջև ձևավորված համագործակցության ծրագրի շրջանակում բարեկամություն է հաստատվել Նոր Նորք վարչական շրջանի և Գեղարքունիքի մարզի միջև: Այս համատեքստում Նոր Նորք վարչական շրջանի նախաձեռնությամբ ղեկավարի աշխատակազմի կրթության, մշակույթի և սպորտի, սոցիալական ապահովության, առողջապահության և ծրագրերի բաժինների, կրթության և գիտության աշխատողների խորհրդային տարածքի արհմիության աջակցությամբ իրականացվել է հերթական ծրագիրը. Նոր Նորք վարչական շրջանի Թ. Կրպեյանի անվան հ.62 ավագ դպրոցի աշակերտները փոխտնօրենի, մանկավարժների և կրթության բաժնի աշխատակիցների ուղեկցությամբ հյուրընկալվել են Գեղարքունիքի մարզի Մարտունու շրջանի Լիճք համայնքի Հ. Թումանյանի անվան միջնակարգ դպրոցում: Թ. Կրպեյանի անվան հ.62 ավագ դպրոցի աշակերտները ներկայացրել են ռազմահայրենասիրական միջոցառում՝ նվիրված Թ. Կրպեյանի 50-ամյակին: Պատասխան միջոցառմամբ ելույթ են ունեցել նաև Հ. Թումանյանի անվան միջնակարգ դպրոցի սաները: Միջոցառման ավարտին ներկաների համար արիության դաս է անցկացրել «Արծիվ մահապարտներ» գումարտակից ամենատարեց մահապարտը՝ Ս. Մաթևոսյանը: Միջոցառման ավարտին Նոր Նորք վարչական շրջանի ղեկավար Արմեն Ուլիխանյանի անունից դպրոցին է նվիրաբերվել հուշանվեր: Քննարկվել են առաջիկայում իրականացվելիք համագործակցության ծրագրերի վերաբերյալ մի շարք հարցեր: Դպրոցի աշակերտների համար կազմակերպվել է նաև ճանաչողական շրջայց համայնքի պատմամշակութային վայրեր:
Նկարները`
այստեղ
