| Ավելի քան 8 հազար երեխա է սպանվել և վիրավորում ստացել 2016թ. ռազմական հակամարտությունների ընթացքում: Այս մասին հայտարարել է ՄԱԿ-ի՝ երեխաների պաշտպանության հարցերով հատուկ ներկայացուցիչ Վիրջինիա Գամբիան:
Նա ներկայացրել է ռազմական հակամարտությունների պայմանների երեխաների դրության մասին ՄԱԿ-ի ամենամյա զեկույցը, փոխանցում է Deutsche Welle-ն:
ՄԱԿ-ի զեկույցում ասվում է, որ 2016թ. Աֆղանստանում սպանվել և տուժել է ավելի քան 3500 երեխա՝ մոտ 25%-ով ավելի շատ, քան 2015թ.: Եմենում սպանվել և տուժել է 1300 երեխա, մոտավորապես այդքան՝ Սիրիայում:
ՄԱԿ-ն առաջին անգամ սև ցուցակում է ներառել Սաուդյան Արաբիայի գլխավորած կոալիցան, որի ավիահարվածների արդյունքում, ըստ կազմակերպության, սպանվել է մոտ 700 երեխա:
Բացի Սաուդյան Արաբիայից՝ ցուցակում են հայտնվել նաև կազմակերպություններ Աֆղանստանից, Իրաքից, Եմենից, Կոնգոյից, Մալիից, Մյանմայից, Սիրիայից, Սուդանից և Կենտրոնական Աֆրիկայից: |
