Զգացածիս մոտ բառերս ի՜նչ են`
Հաստափոր տետրի էջեր խունացած,
Մի դեղնած տոմսակ` գզրոցում ընկած,
Չուղարկված նամակ` մոռացված, մաշված...
Իմացածիս մոտ չիմացա՜ծս ինչ է`
Քառածալքերում տեղ-տեղ կտրտված
Մի հին գրություն` իմաստը կորցրած,
Անխորհուրդ մի կյանք` անտեղի ապրած...
Ազատվեցի՜ ես հուշից մամռապատ,
Շիվար պարզել եմ ափերս դատարկ,
Հարցականներն են գլխիս կամարված`
Օրե՞ր են անցած, թե` կյա՜նք է պարպված...