Հայաստանն այդ ես եմ, դու ես, նա է,
Աշխարհում սփռված-ցրված ամեն մի հայն է,
Հայաստանը մեր համահավաք կերպարն է:
Հայաստանը չի լինի, թե չլինեմ ես,
Թե չլինես դու, թե չլինի նա:
Հայաստանը մենք ենք, միասին ենք…
Մի շեղվեք «Գծից» -
«Գծից» դուրս եկար, չկա Հայաստան-
Կա լոկ հայերի խեղճ հավաքածու:
Հայաստանը ես եմ, դու ես,
Լսու՞մ ես, դու ես, նա է,
Բոլորս ենք, միասին, միակամ:
Հայաստանն աշխարհագրական տեղանուն չէ,
Հայաստանը ոչ միայն Մասիսն է,
Ոչ միայն Սևանն է, և նույնիսկ
Ոչ միայն կորցրած Վանն է:
Հայաստանն առաջին հերթին ՀԱՅՆ է,
Թե չլինի հայը, չի լինի Հայաստանը…
Կլինեն Վանը, Երևանը, Մասիսն ու Սևանը…
Բայց չի լինի Հայաստանը, թե չլինի ՀԱՅԸ:
Եկեք հայ մնանք, լսու՞մ եք, որ ունենանք
Ե՚վպետություն, և՚դրոշ, և՚անուն,
Որ հաստատ քայլերով աշխարհին մեր դեմքը
Ցույց տանք և առաջ գնանք` առանց սարսափելու,
Մեր երկիրը մեր հոգու մեջ է, մեր ավիշի, արյան,
Հզոր է երկիրը, երբ հզոր է հոգին ու միակամ:
Ու՞ր է Բաբելոնը, Ասորեստանը…
Չկա բաբելացի կամ ասորեստանցի,
Տարածքը կա,
Բայց չկա ազգն ու պետությունը:
Հասկացա՞ր:
Հայաստանն այդ ես եմ, դու ես, նա է.
Աշխարհում սփռված-ցրված ամեն մի հայն է`
… Հայաստանում …
Ֆրիդոն Միքայելյան