Articles

Ինձ հիմա՛ սիրիր,

Երբ ունեմ կենդանի անո՜ւն, ազգանո՜ւն,

Բալենու ցողո՜տ շուրթերով ցողիր,

Ինձ օրո՜ր ասա քո՛ օրորոցում:

ժամանակից շուտ թո՛ղ հասունանամ,

Թող որ մի՜շտ լինեմ քո նուրբ ձեռքերին,

Այգուց բարձրացող գոլորշի՜ դառնամ

Ու … նաև գինի՜ խրախճանքների:

Ես գիտեմ, որ դու հետո՜ կարտասվես

Քո ամե՜ն մի քայլափոխին,

Բայց չգիտե՜մ, գիշերներով աչք կփակե՞ս,

Երբ որ դառնամ հո՜ղ ու մոխիր:

Մի հավերժությո՜ւն տառապանքի մեջ

… Մի կանգուն դամբա՜ն,

… Մի քարագիր խո՜սք.

Ինձ սիրիր հիմա՜,

Ինձ հիմա՛ սիրիր,

… Երբ էլ ո՜ւժ չունես սերտելու աղոթք: