Վերջին տարիներին հանրության շրջանում լայն տարածում են գտնում հայրենասիրական թեմատիկայով ազգագրական երգերը: Նմանօրինակ կատարումների հեղինակ և կատարող է նաև Արմանին, ով շարունակաբար երգեր է ձոնում` մեր քաջ հերոսների հիշատակին: Նրա հերոսական թեմայով առաջին ստեղծագործությունը «Թալիշի Արծիվ» երգն էր, որը նվիրված է փոխգնդապետ Արտակ Սեդրակի Աղեկյանի հիշատակին:
2018-ի փետրվար ամսին, տեղի ունեցավ Նարեկ Տիգրանի Գասպարյանի հիշատակին նվիրված` «Անմահ Նարեկ» երգի պրեմիերան:
Վերոնշյալ կատարումները կարճ ժամանակում հասցրեցին սիրվել և կատարվել` հանրության լայն շրջանակների կողմից:
Արմանին նշեց, որ կողմ է հպարտ, խրոխտ, գրագետ և հայաշունչ հերոսական ստեղծագործություններին, իսկ մեր թշնամիների երգելաոճով գրված ու կատարված երգերը՝ չի ընդունում:
Երգի տեսքով հերոսապատումները շարունակվում են. հունիսի 11-ին ապրիլյան պատերազմի հերոս` Բագրատ Արթուրի Ալեքսանյանի ծննդյան օրն է: Հենց այդ օրն էլ Արմանին հանդիսատեսին կներկայացնի իր հեղինակած «Մեր հերոս Բագրատ» ստեղծագործության պրեմիերան:
