Երեկ Հայաստանի Հանրապետության Անկախության 26-րդ տարեդարձը Աբովյանում նշվեց տոնական համերգով:
Համերգին ներկա գտնվեց նաև համայնքի ղեկավար Վահագն Գևորգյանը:
Միջոցառումը բաղկացած էր երեք հատվածից, սկզբում հնչեց անկախության խորհրդին համահունչ երգ-երաժշտություն ու ասմունք, իսկ պարային կատարումով ու եռագույնի խորհրդանշանականությամբ հանդես եկավ Աբովյանի «Նազենիկ» պարային համույթը:
Երկրորդ հատվածում արդեն պարային լայն ծրագրով հանդես եկավ «Կարին» ազգագրական երգի ու պարի համույթը` ՀՀ մշակույթի վաստակավոր գործիչ Գագիկ Գինոսյանի գեղարվեստական ղեկավարությամբ:
Աբովյանցի հանդիսատեսը մեծ բավականությամբ էր հետևում արհեստավարժ մասնագետների բեմադրած «խաղին»:
Ամենավերջին երրորդ հատվածում՝ տպավորիչ պարային համարներից հետո անցում կատարվեց ընդգրկուն պարուսուցման, որի շրջանակներում ազգագրական պարերի հանդեպ հետաքրքրություն ցուցաբերած աբովյանցիները միացան «Կարինի» խմբին` փորձելով անմիջականորեն մասնագետներից ստանալ պատշաճ գիտելիքներ: