Արցախյան պատերազմը անջնջելի հետք թողեց հայ ժողովրդի կյանքում: Հատկապես մնաց հիշողությունների մեջ այն մանուկների, որոնց ճակատագիրն էր իրենց վրա վերցնել հայրենիքի պաշտպանության սրբազան գործը: Հիմա, երբ ասում ենք Արցախյան պատերազմ, հասկանում ենք և՛ 90-ականների, և՛ 2016-ի ապրիլյան պատերազմը: Այդ պատերազմներին իր հայրենանվեր գործն է կատարել Միշա Թադևոսյանը:
1966 թ. մայիսի 27-ն էր, երբ Դվին գյուղում՝ Թադևոսյանների ընտանիքում, ծնվեց հայրենիքի ապագա պաշտպանը՝ Միշան:
Հասակ է առել հասարակ գյուղացու ընտանիքում։ Մանկության մասին խոսելիս դեմքին անհոգ ժպիտ է հայտնվում: Մարդասեր է, երեխաների հետ` երեխա, մեծի հետ՝ մեծ:
Միշան սովորել է Դվինի դպրոցում, որն ավարտելով` կրթությունը շարունակել է Մասիսի գյուղտեխ. ուսումնարանում: 1984-86 թթ. ծառայում է Խորհրդային Ռուսաստանի բանակում:
1988 թ. սկսվեցին հայ-ադրբեջանական բախումները:
1991 թ. լսվում է հերթական գույժը. պատերազմը կրկին ներխուժել էր Արցախ:
Միշա Թադևոսյանը կամավոր մեկնում է առջնագիծ` իր պարտքը տալու հայրենիքին: Ասում են՝ կամավորը հերոս է պատերազմ մեկնելու առաջին իսկ օրից:
Միշան եղել է Լեոնիդ Ազգալդյանի ջոկատից: Նրա պատմելով` Լեոնիդը շատ խիստ էր, միևնույն ժամանակ` զինվորների ընկերը: Հրամանատարը սիրում էր, որ իր հրամանները կատարվեն և չմնան օդում: Լեոնիդն ուզում էր, որ բոլորը հասկանան հայրենիքի արժեքը, և իրենց կյանքի նպատակը համարեն երկիրը շենացնելու և հզորացնելու գործը:
...Թշնամին, չկարողանալով դիմադրել հայկական ուժերի վճռական գործողություններին և վախենալով ավելի ծանր կորուստներ կրելու մտքից, 1994 թ. մայիսի 14-ին զինադադար է խնդրում:
...2016 թ. գարունն էր՝ ապրիլ ամիսը, երբ նորից խաթարվեց հայ ժողովրդի խաղաղ անդորրը: Այդ ժամանակ Միշան և իր ազատամարտիկ ընկերները կրկին իրենց տեղում էին՝ դիրքերում, և իրենց մարտական ոգին էին փոխանցում մեր քաջ հայորդիներին: Այս պատերազմն էլ անդառնալի հետք թողեց հայ ժողովրդի կյանքում, չսպիացող վերքեր՝ հայ մայրերի սրտերում:
Միշա Թադևոսյանը պարգևատրվել է «Հայրենիքի պաշտպանություն», «Անդրանիկ Օզանյան», «Մարտական ծառայություն», ԼՂՀ և ՀՀ «Արիության» և այլ շքանշաններով:
Այսպիսով՝ Արցախյան պատերազմի բովում ծնվեց ազատաբաղձ, ազատատենչ քաջորդիներ մի ամբողջ համաստեղություն, որի «աստղերից» մեկն էլ Միշա Աղվանի Թադևոսյանն էր:
Լարիսա ՂԱԶԱՐՅԱՆ
Մարիա ԱՌԱՔԵԼՅԱՆ
«Հայորդի» լրագրողական ակումբ
«Հայորդի» երիտասարդական, հոգևոր, մշակութային ամսաթերթ Թիվ 3, մարտ 2017թ.
https://www.facebook.com/profile.php?id=100015880478066&ref=ts&fref=ts