Երեկ Հանրապետության մի շարք մարզերում տեղացած կարկուտը սրբել-տարել է դաշտերում եղած բերքն ու բարիքը: Ամռան կեսին տեղացած կարկուտը զարմացրել և զայրացրել է Կոտայքի մարզի բնակիչներին:
Երեկ այստեղ խոշոր կարկուտ է եկել, որը վնասներ է պատճառել գյուղատնտեսությանը: Չարենցավան, Կարենիս, Ալափարս, Ֆանտան, Արզական և հարակից համայնքներում կարկուտը կանաչ բույս չի թողել: Ալափարսի բնակիչ Անդրանիկ Գևորգյանը Հայաստան 24-ի հետ զրույցում պատմեց, որ 15 րոպե տևած կարկուտն ավիրել է համայնքի դաշտերը:
«Մալինան փչացրել է, բույսի ցողունն անգամ ճարդվել է: Լոբի ունեինք, դա էլ արդեն չկա՝ հեչ եղավ, ու մնացած բանջարեղենը ևս», - նեղսրտեց նա:
Բնակչի խոսքով՝ ամբողջ համայնքի մշակովի հողատարածքները մոտ 90 տոկոսով վնասվել են: Առայժմ այստեղ վնասի չափն են ճշտում: Բնական աղետը Ֆանտան համայնքի բնակիչներին ևս զրկել է ապրուստի միջոցից:
«Ինչ կար-չկար սաղ մաքրեց, բերքահավաք արեց, բան չկա էլ», - դժգոհեցին նրանք:
Նույն ողբալի վիճակում են նաև Գեղարքունիքի մարզի բնակիչները: Վարդենիս, Գավառ քաղաքները ևս կարկուտից տուժել են:
«Հեսա կարտոշկեն նենց կթանկանա՝ կդառնա դելիկատես, բերքը 50/50 է արել սաղ», - ասացին նրանք:
Հորդառատ անձրևն Ամավիրի մարզում ողողել է հողատարածքներն ու խաղողի այիգիները՝ գյուղացիներին հսկայական վնաս հասցնելով:
Մանյա Պողոսյան
/hayastan24.com