Խնդրում ենք սպասել...
COMMENT.am
Այսօր`  ուրբաթ, 17 օգոստոսի, 2018 թ.
Ավանդների տոկոսադրույքը`  
Հայկական դրամ
14.00%
,
ԱՄՆ դոլլար
6.50%
,
Եվրոպական Եվրո
4.00%
,
Ռուսական ռուբլի
8.50%

Հոդվածներ

Նոր աղանդի սկզբնավորման նախադրյալներ

Հեղինակ
Հեղինակ`
Հեղինակ
17:32, երեքշաբթի, 12 հունիսի, 2018 թ.
Նոր աղանդի սկզբնավորման նախադրյալներ
    
    

Վերջերս աշխուժացած՝ հոգևոր նկրտումներով սքողված, սակայն բացառապես աշխարհիկ գործելաոճով աչքի ընկնող գործիչներն արդեն հասել են Առաքելական Եկեղեցու հիմքերին՝ սկսելով պնդել, թե անցյալ դարից ի վեր Կաթողիկոսներն ընտրվել են արտաքին միջամտությամբ՝ ԿԳԲ-ի, Վազգեն Սարգսյանի կամ այլ հնարավոր ազդեցությունների արդյունքում։
     Մինչ այս պահը կարելի էր պարզապես արհամարհել նրանց արտաբերած ամեն մեղադրանք, ամեն բառ, ամեն հնչյուն։ Իրենք էին ու իրենց տարածած ստահոդ լուրերը, ավելի ճիշտ՝ կեղծիքի ու շինծուի տարափը, հեղեղը։
     Եթե կամենում ես, որ քո թաքցրած քարը չգտնեն, պահիր այն քարակույտում, իսկ եթե կամենում ես, որ սուտդ չբռնվի՝ քողարկիր այն ստերի հեղեղատում։ Եվ այդպես էլ անում էին՝ առանց տարբերություն ու խտրականություն դնելու, առանց չափի դույզն-ինչ զգացողության։ Սակայն հիմա առաջ քաշված նոր մեղադրանքը արդեն համաեկեղեցական-կանոնական բազմաշերտ մի խնդիր է առաջացնում, ինչը խոսում է խնդրո առարկա գործիչների՝ հոգևոր գիտելիքներից զուրկ ու բոկոտն և հավատքին խորթ լինելու մասին։
     Իբրև առաջին շերտ կարելի է նկատել այն, որ եթե, ինչպես իրենք են պնդում, վերջին մի քանի կաթողիկոսական ընտրությունները եղել են արտաքին ուժերի ազդեցությամբ, այսինքն ոչ-կանոնական, իսկ իրենց՝ աշխարհիկ պատկերացմամբ՝ ոչ-լեգիտիմ, ապա դուրս է գալիս նաև, որ սրբազան յուղի՝ մյուռոնի օրհնությունը, որ կատարել են այդ կաթողիկոսները, եկեղեցիների նավակատիքերը, որ կատարվել են այդ մեռոնով, հոգևորականների օծումները, որ արել են կաթողիկոսները, կամ, առավել ևս, նրանց ձեռնադրած հոգևորականները՝ ամեն բան դուրս է կանոնից։ Այստեղ միայն կարելի է զարմանալ, թե այս համատարած ոչ-կանոնականության մեջ որտեղից են հայտնվել այն «սուրբ-անըստգյուտները», որ միայն իրենց են արժանի նկատում երկնային ու երկրային բոլոր փառքերին ու պատիվներին։ Եվ կամ սա Հայ Եկեղեցին կազմաքանդելու իրենց նախընտրած ճանապարհն է՝ Հայոց Կաթողիկոսներին, նրանց ձեռնադրած եպիսկոպոսներին, կուսակրոն և ամուսնացյալ քահանաներին հռչակել ոչ-կանոնական, դրանով իսկ սահմանելով, թե Հայ Առաքելական Եկեղեցին այլևս գոյություն չունի։ Եվ անշուշտ այս վտանգը կծնրադրեր բոլորիս դռանը, եթե մենք ևս նախընտրած լինեինք հոգևոր գիտելիքների ամբարման՝ բանավոր, ընթերցանությունը մերժող ճանապարհը, որ պատճառ է դառնում թյուրիմացության կամ տգիտության երկրորդ շերտի համար։
     Ահա մի կողմից տ. Կորյունի պնդումը համոզիչ է թվում. ԿԳԲ-ն այնքան հզոր է, որ ոչ միայն կաթողիկոսական, այլև զորավոր տերությունների նախագահական ընտրություններին միջամտելու հանգամանքով է մեղադրվում։ Եվ եթե ԿԳԲ-ն ի զորու է միջամտել գերտերությունների ներքին գործերին, ապա որքան հեշտ պիտի խառնվեր կաթողիկոսական ընտրություններին։ Այս մտածելակերպը լիովին ընդունելի կարող է թվալ բոլոր նրանց, որ հեռու են կրոնից ու հավատքից։
     «Վեցօրեայ» -ում Բարսեղ Մեծը հարցնում է. «Ինչպե՞ս է, որ աստղերը հաստատված են տիեզերքում, ամպերը շարժվում են երկնակամարով, իսկ ջրերը մնում են երկրի մակերևույթին և չեն ներծծվում» ։ Եվ սուրբն անմիջապես պատասխանում է. «Այս ամենի իրականություն դառնալու համար բավարար էր, որ աստվածային Կամքը լիներ» ։ Եթե հավատում ենք Աստծուն, Նրա անսահման և անքննելի զորությանը, պիտի ընդունենք, որ ոչ մի ԿԳԲ և ոչ մի Վազգեն Սարգսյան չէին կարող դեմ գնալ աստվածային Կամքին։ Իսկ եթե գաղափարական և գիտելիքների առումով հավասար ենք տ. կորյուններին, ապա կարող ենք ընդունել նաև, որ վերջին ընտրությունների ժամանակ ԿԳԲ-ն, կամ Վազգեն Սարգսյանը ավելի զորավոր էր, քան Վերին Նախախնամությունը։ Բնականաբար պարզ տրամաբանությունը նաև պիտի հուշի տ. կորյուններին, որ եթե իրենք անհայտ տեսիլքով հավատում են աստվածայինից ավելի բարձր զորության, ուրեմն իրենք ոչ թե Աստծու հավատացյալներ են, այլ նորահայտ և նորագյուտ մի ուղղություն, որ ավանդաբար աղանդ է կոչվել։

Աղբյուրը` facebook.com
Առաջխաղացնել այս նյութը
Տեղեկացնում ենք, որ նյութը հրապարակվել է "Մամուլի խոսնակ" նախագծի շրջանակներում:
Գրանցվի՛ր և հրապարակի՛ր քո հոդվածները:
Հավանել
2
Չհավանել
0
| | |
926 | 0 | 0
Facebook
Մամուլի խոսնակ