Ալավերդի քաղաքի ճոպանուղին արդեն երկու տարի է, ինչ չի շահագործվում: Այն թաղամաս գնացող ճանապարհը կրճատում էր 5, 2 կմ-ով: Ճոպանուղու բացակայությունը մի շարք անհարմարություններ է ստեղծում քաղաքի երկու թաղամասի բնակիչների համար:
Ճոպանուղու վերագործարկումն Ալավերդիում այսօր ամենաքննարկվող թեման է: Ձմռան ամիսներին ճոպանուղին ապահովում է քաղաքի ամենամեծ` Սարահարթ թաղամասի բնակչության անվտանգ երթևեկությունը:
Ճոպանուղուց օգտվողների գերակշիռ մասը Ալավերդու պղնձաձուլարանում հերթափոխով աշխատող մարդիկ են: 1976 թվականին ճոպանուղին կառուցվել է հենց պղնձաձուլարանի աշխատակիցների համար՝ քաղաքի մի հատվածից մյուսին հասնելն ավելի հեշտ ու արագ դարձնելու նպատակով:
Գործունեության ընթացքում ճոպանուղին երկու անգամ է երկարատև ժամանակով դադարեցրել գործունեությունը: Իսկ ահա 2016թ.-ի մարտի 1-ից ճոպանուղու շահագործումը վերջնականապես դադարեցվել է: Քաղաքացիների խոսքով Ալավերդին չեն պատկերացնում առանց ճոպանուղու: Այն իրենց համար միայն տրանսպորտային միջոց չէ: Իրենց հյուրերին Սանահինի ու Հաղպատի եկեղեցիներին հավասար ներկայացվող հպարտություն է, և մինչ օրս էլ չեն հաշտվում ճոպանուղու չաշխատելու մտքի հետ, հույս ուենանոլ, որ մի օր անպայման կվերաշահագործվի:
Ալավերդու ճոպանուղին միակն է Հայաստանում, որը ոչ թե որպես տուրիստական, այլ տրանսպորտային միջոց է ծառայում: Այժմ, սակայն, անորոշ ժամանակով ճոպանուղու գործունեությունը դադարեցված է:
