Հարգելի՛ քույրեր և եղբայրներ ի Քրիստոս։
Այս ամիսների ընթացքում Գարեգին Բ կաթողիկոսի անձի շուրջ խմորումները գնալով խորանում են։ Ես, լինելով Հայ Առաքելական Եկեղեցու զավակ, չեմ կարող անտարբեր մնալ հնչեցված հարցերի նկատմամբ, քանզի անտարբերությունը մահացու մեղք է, ուստի իմ և իմ եղբայրների պատկերացումը Գարեգին Բ-ի հեռացումն է կաթողիկոսական աթոռից։
Կոչ եմ անում ձեզ նույն պահանջով՝ ձեր եկեղեցիներում դա կլինի կիրակի պատարագից հետո, թե շաբաթվա ցանկացած օր, ձեր ձայնը լսելի դարձնեք ձեր քահանայի, վարդապետի և եպիսկոպոսի մոտ։ Մեզ այս վերջին ժամանակներում պետք է Սուրբ Հոգով առաջնորդվող և Աստծո փառքին ծառայող աստվածավախ, հավատացյալ և սրբակենցաղ կաթողիկոս, ով հոժարակամ վերակացու կլինի ըստ Աստծո կամքի և ոչ թե շահախնդրությամբ (Ա Պետ. 5.2) և վստահաբար ասի՝ ճանաչում եմ իմ հոտին և ճանաչվում նրանցից (Հովհ. 10.14) ։
Մեղա՜ Աստծո, դատելու որևէ միտք չունեմ, բայց՝ «Վա՜յ նրանց, որ չարը բարի կանվանեն և բարին՝ չար» (Եսայի 5.20) ։ Ուստի խնդրում եմ ձեզ աղոթքով, ծոմապահությամբ սպառազինվելով՝ համբերությամբ սպասենք նախանձախնդիր ոգով բարձրացված մեր հարցերի լուծմանը։ Անհրաժեշտության դեպքում բոլորս միասիրտ և միահամուռ կերպով հավաքվենք և անվարան կերպով մեր միասնական եկեղեցու պահանջը դնենք թե՛ Գարեգին Բ-ի, թե՛ եպիսկոպոսաց դասի առջև, քանզի իրական մտահոգ հայրապետը եկեղեցու շահը և հավատացյալների կամքը կգերադասի անցողիկ փառքից (Հակ. 1.9-11), այն հավատացյալների, առանց որոնց եկեղեցի չի կարող լինել։ Այս պարագայում սխալված չենք լինի, եթե ասենք՝ ձայն բազմաց, ձայն Աստծո։ Ամեն։
Էդգար դպիր Ումբրեյան
Հայ Առաքելական եկեղեցու զավակ