Փոքր ազգերը խեղճ լինելու իրավունք չունեն, իրավունք չունեն ծնկելու, ընկրկելու. նրանք պետք է լինեն քաջ ու կորովի, զորեղ ու զգոն, միասնական ու միահամուռ: Այս է պատգամել մեզ մեր Սպարապետը՝ Վազգեն Սարգսյանը: Նրա և նրա նման խենթ քաջերի ոգու հառնումն ու ազգապահպան երազի ծնունդն էր հայոց բանակը: Ի հեճուկս դժվարությունների ու խոչընդոտների, մեծաքանակ ոսոխի դավադիր նկրտումների՝ կայացավ հայոց բանակը, ազատագրվեց հայրենի Արցախը, պաշտպանվեցին նորաստեղծ Հայաստանի Հանրապետության սահմանները:
7-րդ դասարանի աշակերտները դաստիարակչական աշխատանքների կազմակերպիչ Լ. Ասատրյանի և դասղեկ Ն. Մելքոնյանի գլխավորությամբ ներկայացրին զորավարի անցած ուղին: Հնչեցին նրան նվիրված բանաստեղծություններ: Ընտրված տեսանյութը ևս մեզ տոգորում էր հայրենասիրությամբ ու անձնվիրության զգացումով:
Հպարտության պահեր պարգևեցին բոլորիս: Մենք ուժեղ ենք միասին. մեր միասնությունն ու հայրենանվեր գործը միայն կարող են մեզ արժանի դարձնել մեր մեծերին...
