Խնդրում ենք սպասել...
Այսօր`  երկուշաբթի, 11 դեկտեմբերի, 2017 թ.
Ավանդների տոկոսադրույքը`  
Հայկական դրամ
14.00%
,
ԱՄՆ դոլլար
6.50%
,
Եվրոպական Եվրո
4.00%
,
Ռուսական ռուբլի
9.00%

Հոդվածներ

ՊԱՐՈՒՅՐ ՍԵՎԱԿ

Armenak Avetisyan
Հեղինակ`
Armenak Avetisyan
22:18, երեքշաբթի, 05 դեկտեմբերի, 2017 թ.
ՊԱՐՈՒՅՐ ՍԵՎԱԿ
    
    

ԱՆՋԱՏՈՒՄ

Լռություն է: Խորունկ: Խորհրդավոր:
     Ամե՜ն ինչ է լռել: Եվ լռել է այնպես,
     Ինչպես բառարանում բառն է լռում:

Եվ գիշերը չունի տասներկու ժամ,
     Այլ կրկնակի: Խոտի թարմ բուրմունք է գալիս
     Այս ասֆալտի՞ց արդյոք,
     Թե՞ այս տըրամվայից,
     Որ ձգվել է հիմա լուռ փողոցում`
     Ինչ-որ հեքիաթական թրթուռի պես:
     Ուրեմն անջատված է հոսանքն էլեկտրական:

«Անջատվա՜ծ է»:
     Այս բառն ինձ դարձըրել է կշեռք
     Եվ ուզում է իր ճիշտ քաշն իմանալ: Սակայն
     Իմ խեղճ թվացույցին այդքան թվեր չկա՜ն…

Ո՞ւր ես: Ի՞նչ ես անում: Անջատվա՜ծ ենք:
     Մագնիսական դա՛շտ կա: Անջատվա՞ծ ենք:
     Խնձորն էլ են քամում – հյութը հանում միջից:
     Այդպես էլ մենք ահա… անջատվա՜ծ ենք…

Ֆուտբոլասեր չեմ ես: Բայց աչքերիս դիմաց
     Ինչ-որ մի գնդակ է անվերջ կաղում-խաղում:
     Խենթանում են այսպե՞ս: Գնդակն ի՞նչ գործ ունի
     Ի՛նձ հետ, լռությա՛ն հետ և մեր անջատմա՛ն հետ…

Եվ այս սեր կոչվածը գուցե սեր չէ բնավ,
     Այլ շչակի ձայն է, կայարանի աղմուկ,
     Եվ կանացի ձեռք է` ճյուղի նման ջարդված…

Տեսնես թե աշխարհում կա՞ գեթ մի կենտ լեզու,
     Որ չունենա իր մեջ այս «անջատվել» բայը:
     Թե կա` ես փոխում եմ ազգությո՜ւնըս…

Կա՞: Պատասխան չկա: Լռություն է:
     Ճիշտ է, որ պատասխան իրոք չկա,
     Բայց և լռությո՛ւն չէ: Համատարած ճի՜չ է:
     Համատարած կա՜նչ է: Համատարած գոռո՜ց:

Քառահատոր հսկա բառարանը հիմա
     Մե՛կ բառով է լցված` «անջատվել» -ով:

Եվ մե՛կ միտք է հիմա մեջըս գոռում-գոչում,
     -Աշխարհում կա՞ արդյոք գոնե մի կե՛նտ լեզու,
     Որ չունենա իր մեջ այս «անջատվել» բայը:
     Թե կա` ես փոխում եմ ազգությո՜ւնըս…

30.IX.1961թ. Երևան

Առաջխաղացնել այս նյութը
Տեղեկացնում ենք, որ նյութը հրապարակվել է "Մամուլի խոսնակ" նախագծի շրջանակներում:
Գրանցվի՛ր և հրապարակի՛ր քո հոդվածները:
Հավանել
1
Չհավանել
0
2901 | 0 | 0
|
Հավանե՛ք և բաժանորդագրվե՛ք
Facebook
ВКонтакте
Մամուլի խոսնակ