Հոդվածներ

Միշտ հսկում ես ամեն քայլս`
     Դա միշտ զգում եմ,
     Հսկում ես և խաղաղ քունս,
     Իսկ դու արթուն ես:

Չե՞ս համոզվել այսքան տարի`
     Արդյոք ես ով եմ,
     Տեսնու՞մ ես` ով թույլ, տկար է`
     Ես նրա քով եմ:

Երբ լռության պատն եմ քանդում`
     Ի՞նչ օգուտ, ասա՛,
     Ջուրն իր ճամփեն գտնում, գնում`
     Ինչ կուզես, արա:

Գլուխդ դիր ուսիս, քնիր,
     Թող օրոր երգեմ,
     Հանգի՜ստ մնա. Այս տարիքում
     Դժվա՜ր թե փոխվեմ:

Թե անունդ Խիղճ չլիներ`
     Քեզ ո՞նց ներեի,
     Անխիղճ դարում ի՞նչ ես ուզում`
     Թող ապրեմ, էլի՜...

21.07.2017