Խնդրում ենք սպասել...

Հոդվածներ

Սպիտակ «Մերսեդեսը»

09:02, հինգշաբթի, 13 հուլիսի, 2017 թ.
Սպիտակ «Մերսեդեսը»
    
    
    

Ա՛հ գիտնայի՜ք թե մարդ ի՛նչպես

Կուլա մինակ, անընտանիք,

Երբեմըն գեթ իմ փողոցես

Դուք կ՛անցնեիք: Սյուլլի Պրյուդոմ


    

Լույսը նոր էր բացվել ու անհասկանալի էր թե ի՞նչպես և ինչո՞ւ էր հայտնվել Նալբանդյան փողոցում:

Քաղաքը դատարկ էր, անմարդ:

Վերջին երեք հատ հազարանոց դրամները ու մեկ հատ երկու հարյուրանոց մետաղադրամը դրամապանակով կարծես իրենց բովանդակ ծանրությամբ բաճկոնը ձգում էին ներքև:

Լույսը նոր էր բացվել ու անհասկանալի էր ինքն ավելի թեթև էր իր գրպանի փողերից թե՞ ոչ:

- Երկու տուփ ծխախոտ – 600 դրամ, մեկ թթվասեր- 580 դրամ, 3 հաց- 330 դրամ, հա մոռացա դեռ իննը օր կա մինչ հաջորդ թոշակ՝ շաքարավազ և սուրճ, համայնատիրության գումարը մինչև հունիս ամիս…փողն ավարտվել էր, իսկ ինքը դեռ հաշվում էր:

Կողքը կանգնեց մի հինգ հարյուր կիլոգրամանոց փողերի կույտ՝ անիվների վրա:

Մերսեդես էր:

Սպիտակ:

Մեքենայից իջավ մեկը ու մոտեցավ իրեն, ձեռքերով ինչ-որ բան էր հարցնում:

Սկզբից ցանկանում էր հարցնել թե ինչո՞ւ հատկապես իրեն, բայց ժպտաց, հիշեց որ փողոցում ուրիշ մարդ չկար:

Մարդը ձեռք ու ոտքով ինչ որ բան էր ասում, քաշում բաճկոնի թևերից, շոյում ուսը:

Հասկանում էր, որ չկարողանալով արտահայտվել մարդը բարկանում էր իր անկարողության վրա:

Հետո մարդը չոքեց, ձեռքերի մատների ծայրերը միացրեց իրար, քաշեց բաճկոնի գրպանից ու խաչակնքեց:

- Հա՜, եկեղեցու տեղն ես հարցնո՛ւմ, դե այդպես էլ ասեիր, Աստված քեզ ինձ մո՛տ ուղարկեց, թե ինձ՝ քեզ մոտ:

Մարդը հասկացրեց, որ ինքն է եկել իր մոտ:

- Ուրեմն նայի՜ր, կգնաս այս փողոցով, - ձեռքով ցույց տվեց ու բացատրեց, մարդն էլ երևի հասկացավ, արագ ոտքի կանգնեց ու վազելով մոտենալով մեքենային միացրեց շարժիչն ու հեռացավ:

- Երևի պրոբլեմները շատ են, որ այս ժամին եկեղեցի է գնում: Ես ի՞նչ պետք է անեմ մինչ խանութների բացվելը:

Ոտքերն էլ անհասկանալի պատճառով տարան ս.Գրիգոր Լուսավորիչ եկեղեցի:

Եկեղեցուն չհասած տեսավ մի ծեր, փող հավաքող կնոջ, սառը աստիճաններին նստած:

Հիշեց երկուհարյուր դրամանոցն ու ձեռքը մտցրեց գրպանը:

Դրամապանակը չկար:

Ժպտաց կնոջը, գրպանից հանեց թաշկինակը, փռեց աստիճանին ու նստեց կնոջ կողքը…


    

Ս.Ումառ-Հարությունյան

Առաջխաղացնել այս նյութը
Նյութը հրապարակվել է Մամուլի խոսնակի շրջանակներում:
Գրանցվի՛ր և հրապարակի՛ր քո հոդվածները:
Հավանել
1
Չհավանել
0
4568 | 0 | 0
Facebook