Մայիսի 6-ին, Նարեկացի արվեստի միությունում դասախոսությամբ հանդես եկան պատմաբան, ազատամարտիկ Արթուր Եղիազարյանը և ԵՊՀ պատմության ֆակուլտետի դասախոս, Երիտասարդ պատմագետների ասոցիացիայի նախագահ Լիլիթ Մկրտչյանը: Թեման` Վանի հերոսական ինքնապաշտպանությունն էր: Պատմաբանները խոսեցին Հայոց ցեղասպանության պատճառների, դրա իրականացման մասին, այնուհետև անդրադարձան ինքնապաշտպանական մարտերին` հատկապես կարևորելով Վանի հերոսական դիմադրությունը:
Արթուր Եղիազարյանի կարծիքով, ցեղասպանությունից խուսափելու համար չափազանց կարևոր է պետականության և բանակի առկայությունը: Պատմաբանը կարծում է, որ պետք չէ ամաչել սեփական պատմությունից. մենք միշտ չէ, որ հնազանդ կերպով ընդունել ենք մեր ճակատագիրը, այլ հնարավորության դեպքում դիմել ենք ինքնապաշտպանության:
ԵՊԱ նախագահ Լիլիթ Մկրտչյանը կարևորեց հայոց ցեղասպանության մանրամասն իմացությունը, կարծրատիպերի հաղթահարումը: Պատմաբանի կարծիքով, մեր սխալներից մեկն էլ միամտությունն էր, թուրքի հանդեպ կույր հավատը: Լիլիթ Մկրտչյանը նշեց, որ ցեղասպանությունը մարդկային պատմությունների միջոցով ներկայացնելը ամենաազդեցիկ միջոցներից է: Այդ համատեքստում, պատմաբանը անդրադարձավ Ավրորայի պատմությանը:
Պատմաբանները խոսեցին նաև զոհի բարդույթը հաղթահարելու, ինքնապաշտպանական մարտերին առավել մեծ նշանակություն տալու անհրաժեշտության մասին:
Հանդիպումը կազմակերպել էին
«Գրադարան» մշակութային նախաձեռնությունն ու Ազգային ընկերվարական ճակատը:
