Գերմանիայի արտաքին գործերի նախարարությունը երեկ չեղյալ է հայտարարել հայոց ցեղասպանության զոհերի հիշատակին նվիրված համերգը, որ տեղի էր ունենալու Ստամբուլում (Գերմանիայի հյուպատոսարանում):
«Ստամբուլի գլխավոր հյուպատոսարանը նոյեմբերի 13-ին չի կարող տրամադրվել նախատեսված համերգի համար», - հայտարարել է Գերմանիայի արտաքին գործերի նախարարությունը:
«Աղետ» անվամբ կնքված նախագիծն իրականացվել է հայ և թուրք երաժիշտներ միավորող Դրեզդենի սիմֆոնիկ նվագախմբի բեմականացմամբ: Այն ներկայացվում է 2015-ից և նվիրված է ցեղասպանության հարյուր ամյակին:
Այս տարվա հունիսին Ինջիրլիկի ռազմահանգրվանին առնչվող ճգնաժամը, որ պայմանավորված էր Գերմանիայի խորհրդարանի կողմից հայող ցեղասպանության ճանաչմամբ, ի վերջո լուծում է գտել: Գերմանացի պատգամավորները կարող են այցելել Իջիրլիկի ռազմահանգրվանում գտնվող գերմանացի զինվորներին:
Թուրքիայի փոխվարչապետ Նուրեդդին Քանիկլին հայտարարել է, թե հունիսին Բունդեսթագը 1915-ի դեպքերի հետ կապված անհեթեթ որոշում էր ընդունել, և մինչև այժմ գերմանացի պատգամավորներին չէր արտոնվել Իջիրլիկ այցելել:
«Գերմանիայի կանցլեր Անգելա Մերկելը բացատրել է, որ գերմանական խորհրդարանի որոշումը քաղաքական որոշում է եղել, որը հաշվի չի առել պատմական իրողությունները: Այս բացատրությունը գոհացում է տալիս մեր սպասումներին», - ասել է փոխվարչապետը:
Գերմանական նվագախմբի ղեկավարությունը թուրքական իշխանություններին մեղադրել է, որ այն Եվրոպական Միության վրա ճնշում է գործադրել, որպեսզի համերգի ընթացքում «ցեղասպանություն» բառը չօգտագործվի: «Դա խոսքի ազատության դեմ դավ է» , - հայտարարել է նվագախմբի ղեկավարը: Ըստ նրա ՝ Եվրամիությունում Թուրքիայի դեսպանը Եվրահանձնաժողովից պահանջել է արգելափակել այս համերգի համար տրամադրվելիք 200 հազար եվրո գումարը: