Փոքրիկ Կարմիր գլխարկը
Ժամանակին գյուղերից մեկում մի շատ գեղեցիկ աղջնակ է ապրել, այնքան գեղեցիկ, որ նմանը չի եղել. մայրը նրա համար խենթանում էր, նրա համար խենթանում էր նաև նրա տատը: Այս բարի կինը նրա համար մի կարմր գլխարկ էր կարել տվել, որը նրան այնքան էր սազում, որ տեսնողն աղջնակին փոքրիկ Կարմիր գլխարկ էր անվանում: Մի անգամ նրա մայրը, որ կարկանդակներ էր թխել, նրան ասում է. «Գնա տես, թե ինչպես է տատիկդ, որովհետև ինձ ասել են, թե նա հիվանդ է եղել, նրան մի կարկանդակ ու այս կարասիկի կարագը տար: Փոքրիկ Կարմիր գլխարկն անմիջապես մեկնեց, որպեսզի գնա մեկ այլ գյուղում ապրող տատի մոտ: Անտառով անցնելիս նա հանդիպեց չարագործ գայլին, որը ցանկանում էր նրան ուտել, բայց չհամարձակվեց, որովհետև անտառում մի քանի փայտահատ կար: Գայլը նրան հարցրեց, թե ուր է գնում. միամիտ աղջնակը, որը չիմանալով, որ վտանգավոր է կանգ առնելն ու գայլին լսելը, ասաց նրան. «Գնում եմ տատիս տեսնելու ու նրան հասցնելու մայրիկիս ուղարկած կարկանդակն ու կարասիկի կարագը»: - Նա հեռո՞ւ է ապրում, - հարցնում է գայլը: - Օ~այո, - ասում է փոքրիկ Կարմիր գլխարկը, - այն ջրաղացը տեսնո՞ւմ եք, դրա մոտի գյուղի առաջին տանը: - Դե լավ, - ասում է գայլը, - ես էլ եմ ուզում նրան այցելել. ես այնտեղ կգնամ այս ճանապարհով, իսկ դու` այն ճանապարհով, ու մենք կպարզենք, թե մեզանից ով ավելի շուտ տեղ կհասնի»: Գայլն ամենակարճ ճանապարհով ամբողջ թափով վազում է, իսկ աղջնակը գնում է ամենաերկար ճանապարհով՝ անշտապ կաղին հավաքելով, թիթեռների հետապնդելով ու ճանապարհին հանդիպած ծաղիներից փունջ կազմելով: Գայլը կարճ ժամանակում հասնում է տատի տուն ու դուռը թակում է` թը'խ, թը'խկ: - «Այդ ո՞վ է: - Ձեր աղջիկ Փոքրիկ Կարմիր գլխարկն է (ասում է գայլը` ձայնը փոխելով), որը ձեզ կարկանդակ ու փոքրիկ կարասով կարագ է բերել, որը մայրս ձեզ է ուղարկել»: Բարի տատը, որն անկողնում պառկած էր, որովհետև դեռ լիովին չէր առողջացել, ձայնում է. «Խցկոցիկը ձգի'ր` մղլակը կընկնի»: Գայլը խցկոցիկը քաշեց, և դուռը բացվեց: Նա նետվեց բարի կնոջ վրա և հոշոտեց` ոչ մի կտոր չթողնելով, քանի որ նա արդեն երեք օր ոչինչ չէր կերել: Այնուհետև նա փակեց դուռը և գնաց պառկեց տատի մահճակալին` սպասելով փոքրիկ Կարմիր գլխարկին, որ որոշ ժամանակ անց եկավ դուռը թակելու` թը'խ, թը'խկ: «Այդ ո՞վ է»: Փոքրիկ Կարմիր գլխարկը, երբ լսեց գայլի կոշտ ձայնը, սկզբում վախեցավ, սակայն կարծեց, թե տատն հարբուխ ունի ու պատասխանեց. «Ես եմ` ձեր աղջիկ փոքրիկ Կարմի գլխարկը, որը ձեզ կարկանդակ ու մի փոքրիկ կարաս կարագ է բերել, որը մայրիկն է ուղարկել»: Ձայնը մի քիչ մեղմելով` գայլը ձայնեց. «Խցկոցիկը քաշի'ր` մղլակը կընկնի»: Փոքրիկ Կարմիր գլխարկը խցկոցիկը քաշեց, և դուռը բացվեց: Երբ աղջիկը ներս մտավ` գայլը գլուխը վերմակի տակ թաքցրեց ու ասաց. «Կարկանդակն ու կարագի կարասիկը դիր ամբարին ու արի կողքս պառկիր»: Փոքրիկ Կարմիր գլխարկը հանվում է և գնում պառկում է անկողնում` շատ զարմանալով տատի հագած գիշերազգեստից: Նա նրան ասում է. «Տատի'կ, այդ ի~նչ մեծ թևեր ունես»: - Դա նրա համար է, որ քեզ լավ գրկեմ, դստրիկս: - Տատի'կ, այդ ինչ մեծ սրունքնե~ր ունես: - Դա նրա համար է, որ լավ վազեմ, զավակս: - Տատի'կ, այդ ինչ մեծ ականջնե~ր ունես: - Դա նրա համար է, որ քեզ լավ լսեմ, զավակս: - Տատի'կ, այդ ինչ մեծ աչքե~ր ունես: - Դա նրա համար է, որ լավ տեսնեմ, զավակս: - Տատի'կ, այդ ինչ մեծ ատամնե~ր ունես: - Դա քեզ լավ ուտելու համար է: Այս խոսքերն ասելով` չար գայլը նետվեց փոքրիկ Կարմիր գլխարկի վրա ու նրան կերավ: |