Սույն թվականի օգոստոսի 1-ին` ժամը 14.00-ին, "Հայ Արտ" արվեստի կենտրոնում (Մաշտոցի պող. 7ա) կկայանա ռուսաստաբնակ հայ նկարչուհի Նարի Յանի (Նարինե Աղաջանյան) "Վերականգնելով արժեքները" խորագրով անհատական ցուցահանդես-վաճառքը:
Երիտասարդ նկարչուհին ցուցահանդեսից գոյացած միջոցներով որոշել է վերականգնել Հովհաննես Այվազովսկու հուշարձանի տարիներ առաջ գողացված վրձինը: Մոտավոր հաշվարկներով բրոնզաձույլ վրձնի պատրաստումն ու տեղադրումը կարժենա 80-90 հազար դրամ: Նարի Յանը մտադիր է նաև տեսանկարահանող սարք տեղադրել հուշարձանի մոտ, որպեսզի նման վայրագությունները հետագայում բացառվեն: Հիշեցնենք, որ երկու տարուց ավել է, ինչ աշխարհահռչակ հայ ծովանկարչի հուշարձանը Երևանի կենտրոնում կանգնած է առանց վրձնի, կամ ավելի ճիշտ` կոտրած վրձնի մնացուկը ձեռքին:
Նկարչուհու աշխատանքներում պատկերված են հայրենքի եկեղեցիներն ու տեսարժան վայրերը: Փաստորեն յուրաքանչյուր անհատ կամ կազմակերպություն` գնելով ներկայացված աշխատանքներից, կարող է դառնալ աշխարահռչակ հայ ծովանկարչի վրձնի վերականգնողը: Ցուցահանդեսին հրավիրված են Երևանի քաղաքապետ Տարոն Մարգարյանը, ՀՀ մշակույթի նախարար Հասմիկ Պողոսյանը, ՀՀ սփյուռքի նախարար Հրանուշ Հակոբյանը, մի շարք բարձրաստիճան հոգևորականներ, գործարարներ և պաշտոնյաներ:
Սիրով հրավիրում ենք բոլոր հետաքրքրված անձանց ներկա գտնվել ցուցահանդեսի բացմանը` սպասվում է գեղեցիկ երաժշտություն, հյուրասիրություն և իհարկե հաճելի մթնոլորտ: