Սույն թվականի մայիսի 27-ին` ժամը 17.00-ին, Նկարիչների միությունում կկայանա լուսանկարչուհի Էմմայի "Ժպտացող արժեքներ" խորագրով առաջին անհատական ցուցահանդեսը: Երիտասարդ լուսանկարչուհին իր առջև խնդիր է դրել վերարժևորել իրական արժեքները: Նրա բաղադրատոմսը պարզ է` որևէ իրական արժեք + որևէ նշանավոր անհատ + մի փոքր ժպիտ:
Լուսանկարչուհին համոզված է, որ "Ընդդեմ" պայքարները մեր իրականությունը լցնում են ոչ ցանկալիով և պետք է ընտրել "Հանուն" ուղին: "Ժպտացող արժեքներ" խորագիրը կրող լուսանկարների ցուցահանդեսը հանուն ազգային և համամարդկային արժեքների է: Էմմայի համոզմամբ այսօր ավելի կարևոր է մարդկանց ուշադրությունը սևեռել լավի և իրոք արժեքավորի վրա և դրա միջոցով ավելացնել լավն ու բարին մեր իրականության մեջ:
Ներկայացված լուսանկարներում արժեքները ներկայացնում են 21 նշանավոր ու սիրված անձիք, ինչպիսիք են` Տիգրան Մանսուրյանը, Ջիվան Գասպարյանը, Կարեն Ջանիբեկյանը, Գագիկ Գինոսյանը, Մկրտիչ Արզումանյանը, Լուսիկ Ագուլեցին, Ռեինկարնացիայի Ռոլանդը, հանրահայտ ռոլիկներով Լևոնը և այլոք:
"Ժպտացող արժեքներ" խորագրով ցուցահանդեսին հրավիրված են բազմաթիվ հայտնի անհատներ, հասարակական-մշակութային գործիչներ և պարզապես ֆոտոարվեստի սիրահարներ:
Սիրով հրավիրում ենք Ձեզ ևս ներկա գտնվել միայն մեկ օր տևող այս յուրօրինակ ցուցահանդեսին և վերագնահատելու ներկայացված արժեքները:
